ఏపీ ఎస్ఈసీ నిమ్మగడ్డ రమేష్ కుమార్ సర్కారు తీరుపై హైకోర్టును ఆశ్రయించారు. ప్రభుత్వం కమిషన్ కు ఏ మాత్రం సహకరించటంలేదని రమేష్ కుమార్ తన పిటీషన్ లో పేర్కొన్నారు. ఎన్నికల కమిషన్‌కు రాష్ట్ర ప్రభుత్వం నిధులు ఇవ్వడం లేదనన్నారు. ఎన్నికల కమిషన్ నిర్వహణకు ఖర్చయ్యే నిధులను ప్రభుత్వం మంజూరు చేయకుండా నిలిపి వేసిందని, ఎన్నికల నిర్వహణకు ప్రభుత్వం సహకరించడం లేదని రమేష్ కుమార్ తన పిటిషన్‌లో పేర్కొన్నారు. దీనిపై కోర్టు వెంటనే జోక్యం చేసుకుని నిధులు విడుదల అయ్యేలా చూడాలని ఆయన కోరారు.
రాజ్యాంగంలోని ఆర్టికల్243(కే) ప్రకారం ఎన్నికల కమిషన్‌కు నిధులు ఆపేయడం చట్ట విరుద్ధమని ఆయన పేర్కొన్నారు. వెంటనే నిధులు విడుదల చేసేలా రాష్ట్ర ప్రభుత్వాన్ని ఆదేశించాలని రాష్ట్ర అత్యున్నత ధర్మాసనాన్ని ఎన్నికల కమిషనర్ కోరారు. ఈ పిటిషన్‌లో ప్రతివాదులుగా ఆర్థిక శాఖ ప్రిన్సిపల్ సెక్రెటరీ, పంచాయతీరాజ్ ప్రిన్సిపల్ సెక్రెటరీలను పేర్కొన్నారు. ప్రభుత్వం నుంచి ఎదురవుతున్న సిబ్బందులపై సమగ్రమైన అఫిడవిట్ దాఖలు చేయాలని కోర్టు ఆదేశించింది. అయితే ప్రభుత్వం వెంటనే 39 లక్షల రూపాయలు మంజూరు చేస్తూ ఆదేశాలు జారీ చేసింది.