వాలంటీర్ల వ్యవహారంలో కొత్త ట్విస్ట్

Full Viewఆంధ్ర ప్రదేశ్ రాజకీయాలు గత కొన్ని రోజులుగా వాలంటీర్ల చుట్టూనే తిరుగుతున్నాయి. దీనికి ప్రధాన కారణం జనసేన అధినేత పవన్ కళ్యాణ్ చేసిన వ్యాఖ్యలే అని చెప్పొచ్చు. కొద్దిరోజుల క్రితం పవన్ కళ్యాణ్ రెండవ విడత వారాహి యాత్రలో భాగంగా ఏలూరులో మాట్లాడుతూ వాలంటీర్ల సేకరించిన సమాచారం ఆధారంగా కొంతమంది వైసీపీ నాయకులు మానవ అక్రమ రవాణాకు పాల్పడుతున్నట్లు సంచలన ఆరోపణలు చేశారు. అందుకే రాష్ట్రంలో పెద్ద ఎత్తున మహిళలు మిస్ అవుతున్నారు అంటూ విమర్శించారు. అప్పటినుంచే ఈ వ్యవహారం జనసేన వర్సెస్ వైసీపీ గా మారిపోయింది. అటు వైసీపీ నేతలతో పాటు వాలంటీర్లు కూడా రోడ్లపై వచ్చి నిరసన వ్యక్తం చేస్తున్నారు. ఈ తరుణంగా గురువారం నాడు కీలక పరిణామ చోటు చేసింది. తాజాగా జనసేన అధినేత పవన్ కళ్యాణ్‌పై విజయవాడ కృష్ణలంక పోలీసులు కేసు నమోదు చేశారు. సురేష్ ఇచ్చిన ఫిర్యాదు మేరకు పోలీసులు కేసు నమోదు చేశారు. 405/ 2023 కింద ఫిర్యాదు స్వీకరించి కేసు నమోదు చేశారు. పవన్ కల్యాణ్ పై సెక్షన్ 153, 153A, 505(2) IPC సెక్షన్ల కింద కేసు నమోదు అయ్యింది.సెక్షన్ 153 ప్రకారం పవన్ మాటల మూలంగా రెండు వర్గాల మధ్య గొడవలు జరిగి శాంతి భద్రతలకు విఘాతం కలిగే ప్రమాదం ఉందంటూ కేసు నమోదైంది.

                                153 A కింద రెండు మతాలు, రెండు కులాల మధ్య విద్వేషాలుకు అవకాశం ఉందంటూ మరో సెక్షన్ కింద పోలీసులు కేసు నమోదు చేశారు. 505(2) కింద తాను చెబుతున్నది రూమర్ అని తెలిసినప్పటికీ కావాలని చెప్పడంతో గొడవలు జరిగే అవకాశం ఉందంటూ మరో సెక్షన్ కింద కేసు నమోదు అయ్యింది. దీంతో ఈ వ్యవహారం కొత్త మలుపు తిరిగినట్లు అయింది. వైసీపీ మంత్రులు, పార్టీ నాయకులు ఎంత ఎటాక్ చేసిన పవన్ కళ్యాణ్ మాత్రం వాలంటీర్ల వ్యవస్థపై విమర్శలు చేస్తూనే ఉన్నారు. ప్రజలను అదుపు చేయడానికే వాలంటీర్‌ వ్యవస్థను తెచ్చారని పవన్ ఆరోపించారు. వాలంటీర్లు సేకరించిన డేటా ఎక్కడికి వెళ్తుంది? అని ప్రశ్నించారు. తాను చెప్పేది అందరు వాలంటీర్ల గురించి కాదన్నారు. ఈ డేటా వేరే వాళ్ల చేతుల్లోకి వెళ్తోందని తెలిపారు. వాలంటీర్లకు 5 వేలు ఇచ్చి ఇంట్లో దూరే అవకాశమిచ్చారని, ప్రతి ఇంటి డేటా అంతా వాలంటీర్లకి తెలుసన్నారు. ఎవరు ఎక్కడికి వెళ్తున్నారో అంతా వాళ్లకి తెలుస్తుందన్నారు. ప్రభుత్వ ఉద్దేశం మరోలా ఉండవచ్చు.. సెన్సిటీవ్‌ ఇన్ఫర్మేషన్‌ బయటకు వెళ్తే ఎలా? అని పవన్‌కల్యాణ్ ప్రశ్నించారు.