ఎన్నికల ముందు ఈ నిర్ణయం ఖచ్చితంగా రాజకీయ ప్రకంపనలు సృష్టించటం ఖాయం అనే అభిప్రాయం వ్యక్తం అవుతోంది. అంటే గత పదేళ్లుగా తాము అభివృద్ధి చేశామని చెప్పుకుంటున్న విద్యా వ్యవస్థను చివరకు కెసిఆర్ కుటుంబం కూడా నమ్మటం లేదా అనే విమర్శలు రావటం ఖాయం అని చెపుతున్నారు. కొద్ది రోజుల క్రితమే హిమాన్షు ఒక ప్రభుత్వ పాఠశాలను చూసి తనకు ఏడుపు వచ్చింది అని చెప్పిన విషయం తెలిసిందే. ఆ పాఠశాలను వివిధ మార్గాల ద్వారా నిధులు సమీకరంచి బాగు చేయించారు కూడా హిమాన్షు. వాస్తవానికి మంత్రి కేటీఆర్ అమెరికా టూర్ తన కొడుకు అండర్ గ్రాడ్యుయేషన్ అడ్మిషన్ కోసమే అని...కానీ పనిలో పనిగా పెట్టుబడులపై చర్చలు అనే అంశాన్ని కూడా తెరపైకి తెచ్చారని ఒక అధికారి వెల్లడించారు. ఎందుకంటే సెప్టెంబర్ లో ఎప్పుడైనా ఎన్నికల షెడ్యూల్ రావొచ్చు...ఎన్నికల ముందు భారీ పెట్టుబడుల వంటి అంశాలపై ఏ కార్పొరేట్ కంపెనీ కూడా నిర్ణయం తీసుకోదు. అసలు రాష్ట్రంలో అటు అధికార బిఆర్ఎస్ తో పాటు అన్ని పార్టీలు ఎన్నికల రంగంలోకి దిగిన వేళ కెటిఆర్ పెట్టుబడుల కోసం ఇప్పుడు అమెరికా వెళుతున్నారు అంటే నమ్ముతారా అని ఒక అధికారి ఆశ్చర్యం వ్యక్తం చేశారు. కొద్ది రోజుల క్రితమే ఆయన ఇదే పేరుతో అమెరికాలో పర్యటించి వచ్చిన విషయం తెలిసిందే. మరీ ఈ సమయంలో కేవలం కొడుకు పని కోసమే వెళుతున్నట్లు కనిపించటం ఎందుకు అని...ఇలా ప్లాన్ చేశారు అని పార్టీ వర్గాలు కూడా దృవీకరిస్తున్నాయి.