తెలుగుదేశం అధినేత, ప్రతిపక్ష నాయకుడు చంద్రబాబునాయుడి కాన్వాయ్ పై రాళ్ల దాడి జరిగింది. అమరావతి పర్యటన సందర్భంగా చంద్రబాబు పార్టీ నేతలతో కలసి వెళుతున్న సమయంలో కొంత మంది ఆయన కాన్వాయ్ పైకి రాళ్లు, చెప్పులు విసిరారు. దీంతో కాన్వాయ్ లోని ఓ కారు అద్దం పగలగా..చంద్రబాబు ఉన్న బస్సు కు కూడా కొంత నష్టం వాటిల్లింది.
భారీ ఎత్తున గుమిగూడిన ప్రజలు చంద్రబాబు పర్యటనకు వ్యతిరేకంగా నల్లజెండాలు చూపుతూ నిరసన వ్యక్తం చేశారు. చంద్రబాబు అమరావతి పర్యటన ప్రకటించిన దగ్గర నుంచి ఈ వ్యవహారం రాజకీయ రంగు పులుముకుంది. దీంతో వైసీపీ, టీడీపీ వర్గాలు బాహాబాహీకి దిగాయి.