ప్రభుత్వ ఆస్తులను ఇష్టానుసారం కట్టబెట్టడం కాకుండా బాధ్యతతో వ్యవహరించటం ద్వారా ప్రభుత్వానికి వేల కోట్ల రూపాయలు ఆదా చేస్తున్నట్లు సీఎం ముఖ్యసలహాదారు అజయ్ కల్లాం తెలిపారు. గత ప్రభుత్వంలో కుదిరిన గ్రీన్ కో ప్రాజెక్టు ఒఫ్పందాన్ని సవరించటం ద్వారా ఈ ప్రాజెక్టు జీవితంలో కాలం ప్రభుత్వానికి వేల కోట్ల రూపాయలు సేవ్ చేసినట్లు వెల్లడించారు. భోగాపురం అంతర్జాతీయ విమానాశ్రయంలోనూ అదే విధంగా చేయగలిగినట్లు తెలిపారు. ఈ మేరకు ప్రాజెక్టు డెవలపర్ జీఎంఆర్ ను ఒఫ్పించామని అజయ్ కల్లాం వెల్లడించారు. ఒప్పదంలో విమానాశ్రయ డెవలపర్ కు 2700 ఎకరాలు ఇవ్వాలని ఉండగా..తాము సంప్రదింపులు జరిపి 500 ఎకరాలు తగ్గించినట్లు తెలిపారు.
ప్రస్తుతం అక్కడ ధర 3 కోట్ల రూపాయలు ఉందని..ఈ లెక్కన 1500 కోట్ల రూపాయలు ఆదా చేసినట్లు అయిందని అజయ్ కల్లాం వివరించారు. విమానాశ్రయం పూర్తయిన తర్వాత ఎకరం పది కోట్ల రూపాయలకు చేరుతుందని..అంటే అప్పుడు 5 వేల కోట్ల రూపాయలు మిగిల్చినట్లు అవుతుందని తెలిపారు. గత ప్రభుత్వం లో చేపట్టిన వివిధ ప్రాజెక్టులకు సంబంధించి రివర్స్ టెండరింగ్ ప్రక్రియ ద్వారా రూ. 2072 కోట్ల 29 లక్షల ప్రజా ధనాన్ని తమ ప్రభుత్వం ఆదా చేసిందని వెల్లడించారు.