రాధే శ్యామ్ ఘోర పరాజయం తర్వాత మరో హిట్ కోసం పాన్ ఇండియా హీరో ప్రభాస్ ఎదురు చూస్తున్నారు. అదే సమయంలో ఎప్పుడో విడుదల కావాల్సిన ఆదిపురుష్ కూడా రకరకాల కారణాలతో వాయిదా పడింది. టీజర్ విడుదల సమయంలోనే చిత్ర యూనిట్ ప్రభాస్ ఫాన్స్ నుంచి తీవ్ర విమర్శలు ఎదుర్కోవాల్సి వచ్చింది. ఈ దెబ్బకు భారీ ఎత్తున మార్పులు చేసి సినిమా విడుదలకు సిద్ధం అవుతుంది. హీరో ప్రభాస్ ఫాన్స్ కు ఇక పండగే. అయన కొత్త సినిమా ఆదిపురుష్ సినిమా కు సంబంధించి చిత్ర యూనిట్ శనివారం నాడు కీలక అప్డేట్ ఇచ్చింది. ఈ సినిమా ట్రైలర్ ను మే 9 న విడుదల చేయనున్నారు. ప్రపంచవ్యాప్తంగా డిజిటల్ ప్లాట్‌ఫారమ్‌లు, థియేటర్‌లలో ఒకే రోజు ట్రైలర్ విడుదల అవుతోంది. ఈ మెగా ట్రైలర్ లాంచ్‌ను ప్రకటిస్తూ..ప్రభాస్ కొత్త పోస్టర్‌ను విడుదల చేశారు. మన దేశంలోనే కాకుండా ప్రపంచవ్యాప్తంగా 70 దేశాలలో ఈ ట్రైలర్ ను రికార్డ్ స్థాయిలో లాంచ్ చేయబోతున్నారు. అందుకే ఇది వరల్డ్ ఈవెంట్ గా మారింది.
భారతదేశంతో పాటు సింగపూర్, ఇండోనేషియా, థాయ్‌లాండ్, మలేషియా, హాంకాంగ్, ఫిలిప్పీన్స్, మయన్మార్, శ్రీలంక, జపాన్‌తో సహా యూఎస్ఏ, కెనడా, మిడిల్ ఈస్ట్, ఆస్ట్రేలియా, న్యూజిలాండ్, ఆసియా & దక్షిణాసియాలోని భూభాగాల్లో; ఆఫ్రికా, యూకే అండ్ యూరప్, రష్యా, ఈజిప్ట్ దేశాల్లో ట్రైలర్ లాంచింగ్ ఈవెంట్ జరగబోతోంది. ఈ గొప్ప భారత ఇతిహాస కథ ప్రపంచ ప్రేక్షకులను ఓ సాహసోసేతమైన యాక్షన్ ప్రపంచంలోకి తీసుకువెళుతుంది అని చిత్ర యూనిట్ చెపుతోంది. ప్రభాస్, కృతిసనన్, సైఫ్ అలీఖాన్, సన్నీ సింగ్, దేవదత్త నాగే, వత్సల్ సేన్, సోనాల్ చౌహాన్ ప్రధాన పాత్రల్లో నటించిన ఆదిపురుష్ జూన్ 16న ప్రపంచ వ్యాప్తంగా విడుదల కాబోతున్న విషయం తెలిసిందే. ఓం రౌత్ దర్శకత్వం లో తెరకెక్కిన ఈ సినిమా తెలుగు తో పాటు హిందీ, తమిళ్, కన్నడ, మలయాళం భాషల్లో విడుదల కానుంది.