దేశ ఆటోమొబైల్ పరిశ్రమ గతంలో ఎన్నడూలేని రీతిలో ఈ సారి సంక్షోభాన్ని ఎదుర్కొంది. అగ్రశ్రేణి కంపెనీల దగ్గర నుంచి అన్నికంపెనీల కార్ల అమ్మకాలు గణనీయంగా తగ్గుముఖం పట్టాయి. దీంతో ఆయా కంపెనీలు ఉత్పత్తిని కూడా అదే స్థాయిలో తగ్గించాయి. 2018 అక్టోబర్-2019 జూలై మధ్య కాలంలో ఆటో కాంపొనెంట్ పరిశ్రమలో ఏకంగా లక్ష మంది తాత్కాలిక కార్మికులు తమ ఉద్యోగాలను కోల్పోయినట్లు ఆటోమోటివ్ కాంపొనెంట్ మ్యానుఫ్యాక్చరర్స్ అసోసియేషన్ (ఏసీఎంఏ) వెల్లడించింది.
అంటే పది నెలల కాలంలో ఏకంగా లక్ష ఉద్యోగాలు కోల్పోవటం ఈ మధ్య కాలంలో ఇదే మొదటిసారి అని చెబుతున్నారు. అదే సమయంలో పరిశ్రమ టర్నోవర్ లో కూడా ఏకంగా 10.1 శాతం క్షీణత నమోదు అయింది. ఈ కాలంలో టర్నోవర్ 1.79 లక్షల కోట్ల రూపాయలు అని ఏసీఎంఎ తెలిపింది. అయితే పరిశ్రమ మాత్రం ఆటో కాంపోనెంట్ పరిశ్రమపై ఏకమొత్తంగా 18 శాతం జీఎస్ టీ ఉండాలని ఏసీఎంఏ ప్రెసిడెంట్ దీపాక్ జైన్ ప్రభుత్వాన్ని కోరుతున్నారు.