అందరి కళ్ళు ఈ ఐపీఓ పైనే

ఐపీఓ అంటే చాలు చాలా మంది ఇన్వెస్టర్లు ఈ మధ్య కళ్ళు మూసుకుని దరఖాస్తు చేస్తున్నారు. దీనికి ప్రధాన కారణం ప్రస్తుతం స్టాక్ మార్కెట్ లో బూమ్ కొనసాగుతుండటం..ఇంచుమించు ప్రతి ఐపీఓలో మంచి రిటర్న్స్ వస్తుండటమే. అందుకే గతంలో ఎన్నడూ లేని రీతిలో ఈ సెప్టెంబర్ లో పెద్ద ఎత్తున ఐపీఓ లు మార్కెట్ లోకి వచ్చాయి. ఇన్వెస్టర్లకు మంచి రిటర్న్స్ కూడా ఇచ్చాయి. ఇప్పడు మరో బిగ్ ఐపీఓ మార్కెట్లోకి వచ్చేందుకు రెడీ అవుతోంది. అదే ఎన్ టిపీసి గ్రీన్ ఎనర్జీ. ఇది పూర్తిగా ఎన్ టిపీసి అనుబంధ సంస్థ. ఎన్ టిపీసి గ్రీన్ ఎనర్జీ ఐపీఓ ద్వారా మార్కెట్ నుంచి పదివేల కోట్ల రూపాయలు సమీకరించాలని టార్గెట్ గా పెట్టుకుంది. ఈ మొత్తం నిధులను అప్పులను తీర్చటంతో పాటు కంపెనీ నూతన ప్రాజెక్ట్ లు, ఇతర కార్పొరేట్ అవసరాలకు ఉపయోగించనుంది.

ఎన్ టిపీసి గ్రీన్ ఎనర్జీ ఐపీఓ నవంబర్ మొదటి వారంలోనే వచ్చే అవకాశం ఉంది. ఐపీఓ కోసం కంపెనీ ముంబై తో పాటు విదేశాల్లో ముఖ్యంగా సింగపూర్ లో కూడా రోడ్ షో లు నిర్వహించేందుకు రెడీ అవుతోంది. ఇప్పుడు ఉన్న ట్రెండ్ ప్రకారం చూసుకుంటే ఎన్ టిపీసి గ్రీన్ ఎనర్జీ ఐపీఓ సూపర్ డూపర్ హిట్ కావటం ఖాయం అని చెప్పొచ్చు. దేశంలోని ఆరు రాష్ట్రాల్లో విండ్, సోలార్ ప్రాజెక్ట్ లు కలిగి ఉన్న ఎన్ టిపీసి గ్రీన్ ఎనర్జీ మహారత్న హోదా కలిగి ఉంది. 2024 ఆగస్ట్ నాటికీ కంపెనీ 3071 మెగావాట్ల సోలార్ ప్రాజెక్ట్స్, 100 మెగావాట్ల విండ్ పవర్ ప్రాజెక్ట్ లు కలిగి ఉంది. రాబోయే సంవత్సరాల్లో కంపెనీ తన సామర్ధ్యాలను పెద్ద ఎత్తున పెంచుకునే ప్రణాళికలు సిద్ధం చేసుకుంటోంది.