రెండు లక్షల కోట్ల మార్కెట్ క్యాపిటలైజషన్ క్లబ్ లో

గత కొన్ని రోజులుగా స్టాక్ మార్కెట్ లో జియో ఫైనాన్షియల్‌ సర్వీసెస్‌ షేర్ ధర దుమ్ము రేపుతోంది. శుక్రవారం నాడు కూడా ఈ షేర్ ధర బిఎస్ఈలో 31 రూపాయలు పెరిగి 334 రూపాయల వద్ద ముగిసింది. ఒక దశలో శుక్రవారం నాడే 347 రూపాయల గరిష్ట స్థాయికి చేరింది. ఈ షేర్ గత కొన్ని రోజులుగా పెరగటంతో ఇప్పుడు జియో ఫైనాన్షియల్‌ సర్వీసెస్‌ మార్కెట్ క్యాపిటలైజషన్ 2.12 లక్షల కోట్ల రూపాయలకు చేరింది. ఈ ఏడాది లో అంటే ఇంకా రెండు నెలలు కూడా పూర్తిగా కాక ముందే ఈ షేర్ ఇన్వెస్టర్లకు 41 శాతం మేర రిటర్న్స్ వచ్చినట్లు అయ్యాయి.

ఇప్పటి వరకు దేశంలోని రెండు లక్షల పైన మార్కెట్ క్యాపిటలైజషన్ కలిగిన కంపెనీలు పన్నెండు ఉంటే..అందులో టాప్ ప్లేస్ లో రిలయన్స్ ఇండస్ట్రీస్ ఉంది. జియో ఫైనాన్షియల్‌ సర్వీసెస్‌ మ్యూచువల్ ఫండ్స్ వ్యాపారం ప్రారంభించే పనిలో ఉండటం తో పాటు సెక్యూర్డ్ రుణాలపై కంపెనీ ఫోకస్ చేస్తున్న కారణంగానే జియో ఫైనాన్షియల్‌ సర్వీసెస్‌ షేర్ లాభాల బాటలో సాగుతుంది అని చెపుతున్నారు. పేటిఎం పే మెంట్స్ బ్యాంకు పై ఆంక్షలు విధించిన విషయం తెలిసిందే. ఇదిలా ఉంటే శుక్రవారం నాడు రిలయన్స్ ఇండస్ట్రీస్ 2996 రూపాయల కొత్త గరిష్ట స్థాయికి చేరింది.