వంద నిమిషాల్లోనే 30213 కోట్ల ఇష్యూ సక్సెస్

జియో ప్లాట్ ఫార్మ్స్ లిమిటెడ్ (జెపీఎల్) ఐపీవో ఫస్ట్ డే నే సరికొత్త రికార్డు లు నమోదు చేసింది. స్టాక్ మార్కెట్ నుంచి 30213 కోట్ల రూపాయలు సమీకరించేందుకు వచ్చిన ఈ సంస్థ తొలిరోజే ఎన్నో సంచలనాలకు వేదికైంది. దేశంలోనే అతి పెద్ద ఐపీఓగా నిలవటమే కాకుండా ప్రారంభం అయిన వంద నిమిషాల్లోనే రికార్డు స్పందనను దక్కించుకుని సెన్సేషన్ క్రియేట్ చేసింది. భారతదేశ చరిత్రలోనే అతిపెద్ద పబ్లిక్ ఇష్యూగా నిలిచిన జియో ప్లాట్‌ఫామ్స్ రూ.30,213 కోట్ల ఐపీఓకు ఇన్వెస్టర్ల నుంచి భారీ స్పందన లభించింది. బుధవారం ఉదయం ప్రారంభమైన ఈ ఐపీఓ కేవలం 100 నిమిషాల్లోనే పూర్తిగా సబ్‌స్క్రైబ్ అయింది. తాజా గణాంకాల ప్రకారం, ఈ ఇష్యూ 1.14 రెట్లు సబ్‌స్క్రైబ్ కాగా, క్వాలిఫైడ్ ఇన్‌స్టిట్యూషనల్ బయ్యర్స్ (QIBs) కోసం కేటాయించిన వాటా 3.68 రెట్లు సబ్‌స్క్రైబ్ అయింది. ఇప్పటివరకు ఈ ఐపీఓకు 10 లక్షలకు పైగా దరఖాస్తులు వచ్చాయి. అక్టోబర్ 23 వరకు ఈ ఇష్యూలో షేర్ల కోసం దరఖాస్తు చేసుకునే అవకాశం ఉంటుంది.

పబ్లిక్ ఇష్యూ ప్రారంభం కావడానికి ముందే జియో ఐపీఓపై ఇన్వెస్టర్ల ఆసక్తి స్పష్టంగా కనిపించింది. సుమారు రూ.8,110 కోట్ల విలువైన షేర్లను కలిగి ఉన్న యాంకర్ ఇన్వెస్టర్ల విభాగానికి రూ.2.5 లక్షల కోట్లకు పైగా విలువైన బిడ్లు వచ్చాయి. అంటే, ఆఫర్ చేసిన షేర్ల కంటే 30 రెట్లకు పైగా డిమాండ్ ఏర్పడింది. ఈ విభాగంలో అత్యధిక కేటాయింపును ఎల్ఐసీ దక్కించుకుంది. దీని విలువ సుమారు రూ.500 కోట్లు. ఐపీఓ పరిమాణం పరంగా కూడా జియో కొత్త రికార్డు సృష్టించింది. ఇప్పటివరకు భారతదేశంలోనే అతిపెద్ద ఐపీఓ నిర్వహించిన సంస్థగా హ్యుందాయ్ మోటార్ ఇండియా నిలిచింది. ఆ కంపెనీ ఐపీఓ విలువ రూ.27,870 కోట్లు. ఇప్పుడు జియో ఐపీఓ ఆ రికార్డును అధిగమించింది.