బాలయ్యపై బాబుకు ఈ సడన్ ప్రేమ ఏంటో?!
అది మహానాడు అయినా..ఏ తెలుగు దేశం కీలక సమావేశం అయినా వేదిక వెనక ఉండే ఫొటోల్లో పార్టీ వ్యవస్థాపక అధ్యక్షుడు ఎన్టీఆర్ తో పాటు టీడీపీ అధినేత చంద్రబాబు, రెండు రాష్ట్రాల అధ్యక్షులు, టీడీపీ ప్రధాన కార్యదర్శి నారా లోకేష్ ఫోటో మాత్రమే పెడతారు. అలాంటిది బుధవారం నాడు హైదరాబాద్ లో జరిగిన టీడీపీ ఆవిర్భావ సభలో వేదిక వెనక ఏర్పాటు చేసిన ఫ్లెక్సీ లో తొలి సారి ఎన్టీఆర్ తనయుడు, హీరో, ఎమ్మెల్యే బాలకృష్ణ ఫోటో పెట్టారు. ఇది ఇప్పుడు టీడీపీ లో హాట్ టాపిక్ గా మారింది. గతంలో ఎప్పుడూ ఇలా బాలకృష్ణ ఫోటో పెట్టలేదు. ఇంతటి కీలక నిర్ణయం తెలంగాణ టీడీపీ ప్రెసిడెంట్ కాసాని జానేశ్వర్ సొంతంగా తెసుకోగలరా అంటే నో అనే చెపుతున్నాయి టీడీపీ వర్గాలు. మరి ఇంతలోనే అంత మార్పు ఎందుకు వచ్చింది అన్నది కూడా పార్టీ నాయకుల మధ్య చర్చ సాగుతోంది. వాస్తవానికి బాలకృష్ణ తనకు పొలిట్ బ్యూరో సభ్యత్వం ఇవ్వడంపై అప్పట్లో అలక పూనారు . చాలా రోజులు పార్టీ కార్యక్రమాలకు దూరంగా కూడా ఉన్నారు.
