జగన్ ను పవన్ కళ్యాణ్ అదే ప్రశ్న అడిగితే?!

ఏ రాజకీయ పార్టీ అయినా విస్తరణకు చిన్నపాటి ఛాన్స్ ఉన్నా వదులుకోదు. ఎన్నో ప్రతికూలతలు..గతంలో ఆ ప్రాంత ప్రజలపై ఘాటు విమర్శలు చేసిన తెలంగాణ సీఎం కెసిఆర్ కూడా ఇప్పుడు ఆంధ్ర ప్రదేశ్ లో బిఆర్ఎస్ పార్టీ ని బరిలోకి దింపే ప్రయత్నాల్లో ఉన్నారు. తెలంగాణ సెంటిమెంట్ తో భారీగా రాజకీయ లబ్ది పొందిన అయన ఇప్పుడు పార్టీ పేరులోనే తెలంగాణ తీసివేయటంతో ఇప్పుడు ఈ ప్రాంతం ఓపెన్ ఫర్ అల్ అన్నట్లు అయింది. అంతకు ముందు కాదని కాకపోయినా ..సెంటిమెంట్ ముందు ఇతర పార్టీలు.. ఏకంగా ప్రత్యేక రాష్ట్రాన్ని ఇచ్చిన కాంగ్రెస్ పార్టీనే బొక్కబోర్లా పడ్డది రెండు సార్లు. ఆంధ్ర ప్రదేశ్ కు చెందిన అధికార వైసీపీ మంత్రులు , నేతలు జనసేన అధినేత పవన్ కళ్యాణ్ ను టార్గెట్ చేస్తూ దమ్ముంటే రాష్ట్రంలోని 175 సీట్లలో పోటీ చేయాలనీ పదే పదే సవాళ్లు విసురుతున్నారు. వాళ్ళ ఉద్దేశం రెచ్చగొట్టి లబ్ది పొందాలని. పవన్ కళ్యాణ్ ఇప్పటివరకు ఎప్పుడూ అధికారంలో లేరు...స్వయంగా ఆయనే రెండు చోట్ల ఓటమి పాలు అయిన విషయం తెలిసిందే. అయినా వైసీపీ మంత్రులు ..నేతలు పదే పదే ఇదే డిమాండ్ ఎందుకు లేవనెత్తుతున్నారు అంటే...వచ్చే ఎన్నికల్లో టీడీపీ, జనసేన కలవకుండా చేయటం కోసమే అన్న విషయం అందరికి తెలిసిందే. టీడీపీ, జనసేన కలిస్తే వైసీపీ గెలుపు అంత ఈజీ కాదనే అంచనాలు ఉన్నాయి. అందుకే ఈ డిమాండ్ తో ఇరకాటంలోకి పెట్టాలని ప్రయత్నం. కాసేపు జనసేన సంగతి పక్కనే పెడితే. ఇదే పవన్ కళ్యాణ్ వచ్చే తెలంగాణ అసెంబ్లీ ఎన్నికల్లో వైసీపీ, జగన్ 119 సీట్లలో అభ్యర్థులను పెట్టాలని డిమాండ్ చేస్తే అందుకు వైసీపీ ఒప్పుకుంటుందా.

కెసిఆర్ పార్టీ పేరును బిఆర్ఎస్ గా మార్చాక తెలంగాణ ఉద్యమంలో కెసిఆర్ దిగటానికి పరోక్షంగా కారణం అయిన చంద్రబాబు నాయుడే మళ్ళీ తెలంగాణ లో టీడీపీ కారక్రమాలు పెంచారు. మరి జగన్ ఆ పని ఎందుకు చేయటంలేదు అన్నది ఇప్పుడు తెరపైకి రావటం ఖాయం. వైస్సార్ సీఎం చేసింది ఉమ్మడి రాష్ట్రంలో...ఆయనకు తెలంగాణ లోనూ పెద్ద ఎత్తున అభిమానులు ఉన్నారు. కెసిఆర్ పార్టీ ఆంధ్ర ప్రదేశ్ లో పోటీకి సిద్ధం అవుతున్న వేళ జగన్ వైసీపీ తెలంగాణాలో పోటీ చేయటానికి ఇబ్బంది ఏమి ఉంటది. పైగా ఆర్థికంగా...అన్ని రకాలుగా వైసీపీ ఇప్పుడు బలంగా ఉంది. అయినా కూడా వైసీపీ, జగన్ లు తెలంగాణ లో పోటీ అంశంపై ఏమి మాట్లాడం లేదు అంటే షర్మిల పార్టీ వైస్సార్ టి పి కి సాయం చేయటానికా...లేక కెసిఆర్ కు ప్రయోజనము కల్పించటానికా అన్న చర్చ సాగుతోంది. షర్మిల పార్టీ పెట్టిన సమయంలో సజ్జల రామకృష్ణా రెడ్డి తాము చాలా విషయాలు అలోచించి తెలంగాణలో పోటీ వద్దని నిర్ణయం తీసుకున్నట్లు చెప్పారు. కానీ ఇప్పటి పరిస్థితి అది కాదు. ఆంధ్ర ప్రదేశ్ మంత్రులు పవన్ కళ్యాణ్ ను డిమాండ్ చేస్తున్నట్లు వైసీపీ తెలంగాణాలో 119 సీట్లలో పోటీచేయాలని డిమాండ్ చేస్తే అందుకు జగన్ అంగీకరిస్తారా.?. గత ఎన్నికల సమయంలో వైసీపీ కి అప్పట్లో అధికారంలో ఉన్న ఇప్పటి బిఆర్ఎస్ సాయం చేసినట్లు రాజకీయ వర్గాల్లో బలంగా ప్రచారం జరిగింది. మరి ఇదే కారణం తో జగన్ ఛాన్స్ ఉన్నా తెలంగాణ లో పోటీకి దూరంగా ఉంటే దీనిపై పలు అనుమానాలు రావటం ఖాయం.