లోకేష్ ముందుకు..చంద్రబాబు వెనక్కు!

సహజంగా పార్టీ అధినేతే సుప్రీమ్. ఏ పార్టీలో అయినా అలాగే ఉంటుంది. తెలుగుదేశం విషయానికి వచ్చేసరికి ఆ పార్టీ అధినేత చంద్రబాబునాయుడి ట్విట్టర్ ఖాతా, ఫేస్ బుక్ ఖాతాల్లో ఆసక్తికర అంశాలు కన్పించాయి. ఆయా పేజీల ఖాతాల్లో హెడర్ ఈ లుక్ కన్పిస్తుంది. అది చంద్రబాబు అధికారిక ఖాతా. సహజంగా చంద్రబాబు ఫోటో పెద్దగా ఉండి..కావాలంటే ఇతర ఫోటోలు పెట్టుకోవచ్చు. ఈ రెండు ఖాతాల్లోనూ విచిత్రం నారా లోకేష్ ఫోటోలు ముందు పెట్టి..చంద్రబాబుది చిన్న ఫోటో పెట్టారు. అంటే దీని ద్వారా పార్టీ నాయకుల..శ్రేణులకు ఓ స్పష్టమైన సంకేతం ఇచ్చారనే అభిప్రాయం పార్టీ వర్గాల్లో వ్యక్తం అవుతోంది.

మరో విశేషం ఏమిటంటే అందులోనే ఓ మూలన పార్టీ వ్యవస్థాపకుడు ఎన్టీఆర్ తోపాటు ఏపీ పార్టీ ప్రెసిడెంట్ అచ్చెన్నాయుడు, తెలంగాణ పార్టీ నాయకుడు బక్కని నర్సింహుల ఫోటోలు కూడా ఉన్నాయి. ఇవి తరచితరచి చూస్తే తప్ప కన్పించవు. కానీ చంద్రబాబు రెండు ఖాతాల్లోనూ ఆయన ఫోటోను ఓ మూలకు నెట్టేసి...నారా లోకేష్ ముందుకు వచ్చేశారు. ఇది చూస్తే అసలు పార్టీ ప్రెసిడెంట్ చంద్రబాబా లేక నారా లోకేష్ అన్న అనుమానం రాకమానదు. పార్టీలో ఆదిపత్యం..పెత్తనం ఎవరిదో ఇలా చెప్పినట్లు ఉన్నారనే అభిప్రాయం పార్టీ నాయకుల్లో వ్యక్తం అవుతోంది.