కుల సంఘాలు..వ్యాపార సంఘాల మద్దతు తీర్మానాలా!
మరి అలాంటిది ఎన్నికల ముందు అది కూడా కెటిఆర్ నియోజకవర్గంలో ఓట్ల కోసం ఇలా కుల సంఘాలు, వ్యాపార సంఘాలతో తీర్మానాలు చేయించటం ఏమిటి ...వాటిని ఏకంగా ముఖ్యమంత్రి కెసిఆర్ సమక్షంలో అందచేయటం అన్నది ప్రాధాన్యత సంతరించుకుంది. సిరిసిల్లకు ప్రవహించిన నిధులు, చేసిన పనులు చూపించి ధీమాగా ఉండాల్సిన కేటీఆర్ ఎక్కడా లేని విధంగా ఇలా తీర్మానాలు చేయించుకోవటం ఎలాంటి సంకేతాలు పంపుతుంది అనే చర్చ కూడా సాగుతోంది. ఈ మీటింగ్ లో మాట్లాడిన సీఎం కెసిఆర్ బతుకమ్మ చీరలపై సంచలన వ్యాఖ్యలు చేశారు. బతుకమ్మ చీరలు నిన్ను ఎవరు కట్టుకోమన్నరు. జబర్దస్త్ ఉందా?. ఎవరైనా బతిమిలాడిర్రా. కొంతమంది బతుకమ్మ చీరలను కాల్చి నానా యాగీ చేశారు. వీటిపై కూడా రాజకీయం చేశారు. ఇలాంటి వాళ్ళు ఎప్పుడూ ఉంటారు. ఈ చీరలు చేనేతల కన్నీళ్లు తుడిచేవి. ఒక గొప్ప మానవతా దృక్పధంతో చేప్పట్టిన పథకం అది. గతంలో ఇక్కడ ఆత్మహత్యలు ఉండేవి. మంత్రి కెటిఆర్ చేతిలోనే ఆ శాఖ కూడా కూడా ఉండటంతో చేనేతలకు మేలు చేసే ఎన్నో నిర్ణయాలు తీసుకున్నారు అని తెలిపారు. వచ్చే ఎన్నికల్లో ఓటు విషయంలో జాగ్రత్తగా ఉండాలని...లేక పోతే పెద్ద ప్రమాదం పొంచి ఉంది అని హెచ్చరించారు.
