ఎన్నికల షెడ్యూల్ ముందు అసలు పనులు సాగుతాయా?
గత కొంత కాలంగా ఐటి శాఖ తో పాటు, ఈడీ లు తెలంగాణాలో రియల్ ఎస్టేట్ సంస్థలు, మెడికల్ కాలేజీలు ఇలా పలు కీలక సంస్థల్లో దాడులు చేసి పెద్ద ఎత్తున సమాచారం సేకరించింది. పలు రియల్ ఎస్టేట్ సంస్థల వెనక ప్రభుత్వ పెద్దలు ఉన్నట్లు ఆరోపణలు కూడా వచ్చిన విషయం తెలిసిందే. కేంద్ర ఏజెన్సీలు సేకరించిన సమాచారాన్ని కేంద్రంలోని బీజేపీ కూడా ఎన్నికల సమయంలోనే వాడుకుంటుంది అనే విమర్శలు వెల్లువెత్తుతున్న విషయం తెలిసిందే. మరో వైపు ఢిల్లీ లిక్కర్ స్కాం లో ముఖ్యమంత్రి కెసిఆర్ కుమార్తె, ఎమ్మెల్సీ కవిత విషయంలో విచారణ సంస్థల దూకుడు తగ్గించాయనే చర్చ ఎప్పటి నుంచో ఉంది. నిన్న మొన్నటి వరకు ప్రధాని మోడీ పై పెద్ద ఎత్తున విమర్శలు చేసిన కెసిఆర్ ఇప్పుడు మోడీ తనకు మంచి మిత్రుడు అంటూ మహారాష్ట్ర పర్యటనలో ప్రకటించి అందరిని ఒకింత షాక్ కు గురి చేశారు అని చెప్పొచ్చు. ఇప్పుడు కెటిఆర్ రెండు నెలల్లో ఎన్నికల నోటిఫికేషన్ రానున్న తరుణంలో ఢిల్లీ టూర్ పెట్టుకోవటం వెనక రాజకీయ అంశాలే తప్ప పైకి చెపుతున్నట్లు అభివృద్ధి అంశాలకు ఛాన్స్ తక్కువ అని..మహా ఉంటే ఎప్పటిలాగానే ఏ మంత్రికి ఆ మంత్రికి వినతి పత్రాలు ఇస్తారు...లోపల మాట్లాడే అంశాలు మాత్రం వేరుగా ఉంటాయని ఒక అధికారి వ్యాఖ్యానించారు. ఎన్నికలకు అతి తక్కువ సమయం ఉన్న వేళ కెటిఆర్ పాత ఎజెండా తో కొత్త టూర్ పెట్టుకోవటం పలు అనుమానాలకు తావిస్తోంది.
