బీజేపీ డిజిటల్ యాడ్స్ దూకుడు

తెలంగాణ బీజేపీది విచిత్ర పరిస్థితి. బండి సంజయ్ ను రాష్ట్ర అధ్యక్ష బాధ్యతల నుంచి తప్పించిన తర్వాత ఒక్కసారిగా ఆ పార్టీ లో జోష్ పూర్తిగా తగ్గిపోయింది. అప్పటివరకు ఉన్న హడావుడి కాస్తా ఇప్పుడు డల్ అయింది అనే అభిప్రాయం ఆ పార్టీ నేతల్లోనే ఉంది. బీజేపీ కొత్త అధ్యక్షుడిగా కేంద్ర మంత్రి కిషన్ రెడ్డి నియమితులు అయిన తర్వాత బండి సంజయ్ తరహా దూకుడు మిస్ అయింది అనే ఫీలింగ్ లోనే ఎక్కువ మంది పార్టీ నేతలు ఉన్నారు. ఒకప్పుడు అధికార బిఆర్ఎస్ తో ఢీ అంటే ఢీ అన్నట్లు ఉన్న బీజేపీ ఇప్పుడు ఏదో పార్టీ ఉంది అంటే ఉంది అనే తరహాలో తప్ప అధికార పార్టీ ని ఢీకొట్టే వాతావరణం లేదు అనే చర్చ ఆ పార్టీ నాయకుల్లో కూడా సాగుతుంది. ఇది క్షేత్ర స్థాయి పరిస్థితి. అయితే సోషల్ మీడియా లో మాత్రం తెలంగాణ బీజేపీ దూకుడు పెంచినట్లు స్పష్టంగా కనిపిస్తోంది. ఏ వెబ్ సైట్ ఓపెన్ చేసినా...అంటే ప్రధాన పత్రికల దగ్గర నుంచి అన్ని వార్తల వెబ్ సైట్స్ లో బీజేపీ పెద్ద ఎత్తున యాడ్స్ కుమ్ముతోంది.

నేరుగా ముఖ్యమంత్రి కెసిఆర్ తో పాటు అయన కుటుంబ సభ్యులు అంటే మంత్రి కేటీఆర్, కెసిఆర్ కూతురు, ఎమ్మెల్సీ కవితలపై కూడా డైరెక్ట్ ఎటాక్ చేస్తూ యాడ్స్ ఇచ్చారు. ‘కొడుక్కి రియల్ ఎస్టేట్..కూతురికి లిక్కర్ కట్టబెట్టినందుకు.చట్టాన్ని చుట్టంగా చేసుకున్న దౌర్జన్య పాలనకు, యువత కలలను కల్లలు చేసినా పేపర్ లీకులకు, రైతులకు భీమా అందించలేని పాలనకు, మహిళలపై ఆగని అఘాయిత్యాలకు’ సాలు దొర సాలు దొర ఉద్యమంలో భాగం అవ్వండి అంటూ యాడ్స్ ఇస్తోంది. ఎక్కడ చూసిన ఇప్పుడు ఇవే కనిపిస్తున్నాయి. అయితే తెలంగాణ అధికార బిఆర్ఎస్ ను ఢీకొట్టటానికి ఈ డిజిటల్ ప్రచారం ఒక్కటే సరిపోతుందా అన్న సందేహాలను ఆ పార్టీ నాయకులే వ్యక్తం చేస్తున్నారు. అయితే ఏ యాడ్స్ మాత్రం అందరి దృష్టిని ఆకర్షిస్తున్నాయి.