బీజేపీ అవకాశాలు వీక్...అసమ్మతి పీక్!
నిన్న మొన్నటి వరకు తెలంగాణ బీజేపీ నేతలతో పాటు, కేంద్ర బీజేపీ నేతలు కూడా ఢిల్లీ లిక్కర్ స్కాం, కెసిఆర్ సర్కార్ అవినీతి అంశాలపై పెద్ద ఎత్తున ఆరోపణలు చేశారు. కేంద్రంలో అధికారంలో ఉండి కూడా ఏ ఒక్క అంశంలో చర్యల దిశగా ముందుకు సాగకుండా కేవలం విమర్శలు చేస్తూ ముందుకు సాగితే రాజకీయంగా ఉపయోగం ఉంటుందా అనే ప్రశ్నలు కూడా తలెత్తుతున్నాయి. కాంగ్రెస్ నుంచి బీజేపీ లో చేరి ఉన్న ఎమ్మెల్యే పదవి కూడా పోగొట్టుకున్న కోమటిరెడ్డి రాజగోపాల్ రెడ్డి ఎలాంటి నిర్ణయం తీసుకుంటారు అన్నదే ఇప్పుడు అందరి దృష్టిని ఆకర్షిస్తున్న అంశం. ఢిల్లీ లో అధిష్టానం పెద్దలను కలవటానికి వెళ్లే ముందే కోమటిరెడ్డి రాజగోపాల్ రెడ్డి మీడియా తో మాట్లాడుతూ కవిత అరెస్ట్, కెసిఆర్ సర్కారు అవినీతిపై చర్యలు ఉంటేనే బీజేపీ ని తెలంగాణ లో నమ్మే అవకాశం ఉంది అని..లేకపోతే ఇద్దరూ ఒకటే అనే అనుమానాలు వస్తాయని సంచలన వ్యాఖ్యలు చేశారు. బీజేపీ కేంద్ర నాయకత్వం పార్టీ లో మార్పులు చేసి వదిలేస్తుందా...లేక మరింత ముందుకు వెళుతుందా అన్నది ఇప్పుడు కీలకంగా మారనుంది. అయితే ఎక్కువ మంది నేతలు మాత్రం తెలంగాణ లో కాంగ్రెస్ ను నిలువరించడానికి అటు బిఆర్ఎస్, బీజేపీ లు పరస్పరం సహకరించుకోవటం, లోక్ సభ ఎన్నికల్లో కూడా పరస్పర సహకారం కోసం అంగీకారం కుదిరింది అనే ప్రచారం జోరందుకుంది. కేంద్ర ప్రభుత్వం తరపున ఎలాంటి యాక్షన్స్ ఉండకపోతే మాత్రం ఇదే అభిప్రాయం మరింత బలోపేతం అయ్యే అవకాశం ఉంది. కొంత కాలం క్రితం వరకు జోష్ లో ఉన్న బీజేపీ గత కొంత కాలంగా పూర్తిగా డీలా పడిపోయింది అని..ఇప్పుడు అది పరుగులు పెట్టడం అంటే అంత ఈజీగా జరిగే పని కాదు అని చెపుతున్నారు. చూడాలి మరి రాబోయే రోజుల్లో ఎలాంటి మార్పులు చోటుచేసుకుంటాయో.
