కెసిఆర్ ను ఇరకాటంలో పెట్టిన ప్రకాష్ అంబేద్కర్?!

హైదరాబాద్ దేశంలోని అద్భుత నగరాల్లో ఒకటి. దేశంలోని పలు మెట్రో నగరాల కంటే కూడా ఇక్కడ మెరుగైన మౌలిక వసతులు ఉన్నాయి. తెలంగాణా రాష్ట్రానికి హైదరాబాద్ గుండె వంటిది అనే చెప్పాలి. రాష్ట్రానికి ఆదాయం సమకూర్చటంపాటు పలు అంశాల్లో హైదరాబాద్ ఎంతో ప్రత్యేకత సంతరించుకున్న విషయం తెలిసిందే. శుక్రవారం నాడు అంబేద్కర్ జయంతి సందర్భంగా ఐ మాక్స్ పక్కన కొత్తగా 125 అడుగుల అంబేద్కర్ విగ్రహం ఏర్పాటు చేయటం, దీనికి ప్రత్యేక అథితిగా అంబేద్కర్ మనవడు ప్రకాష్ అంబేద్కర్ ను ఆహ్వానించారు. అంత వరకు బాగానే ఉంది. ఈ సభలో మాట్లాడిన ప్రకాష్ అంబేద్కర్ సంచలన ప్రతిపాదన చేశారు.. హైదరాబాద్ ను దేశ రెండవ రాజధాని చేయాలని, అప్పుడే అంబేద్కర్ కలను నిజం చేసినట్లు అవుతుంది అన్నారు. ఈ దిశగా కేంద్రంపై సీఎం కెసిఆర్ ఒత్తిడి తేవాలని...దేశ రక్షణ పరంగా హైదరాబాద్ ఎంతో సురక్షిత ప్రాంతంలో ఉంది అని...అందుకే అంబేద్కర్ ఈ ప్రతిపాదన చేశారు అన్నారు. అయితే ప్రకాష్ అంబేద్కర్ చేసిన ఈ ప్రతిపాదనతో సీఎం కెసిఆర్ ఇరకాటంలో పడినట్లు అయింది అనే చర్చ సాగుతోంది.

వాస్తవానికి ఈ ప్రతిపాదన కొత్తది ఏమి కాదు...ఎప్పటినుంచో ఉన్నదే. అయితే కెసిఆర్ సమక్షంలో ప్రకాష్ అంబేద్కర్ ఈ ప్రతిపాదన తేవటంతో బిఆర్ఎస్ వర్గాలు షాక్ అయ్యాయి. అయన ప్రతిపాదించినట్లు అదే జరిగితే హైదరాబాద్ పై పూర్తిస్థాయి నియంత్రణ తెలంగాణ ప్రభుత్వం చేజారుతుంది. సహజంగానే ఏ రాష్ట్రం ఇందుకు అంగీకరించదు. ప్రాంతీయవాదం తో తొలుత టిఆర్ఎస్ పేరుతో పార్టీ పెట్టిన కెసిఆర్ ఇప్పుడు దేశ రాజకీయాల్లో వెళ్లేందుకు పేరును బిఆర్ఎస్ గా మార్చిన విషయం తెలిసిందే. ప్రాంతీయ వాదిగా ఉన్నప్పుడు ఓకే కానీ..ఇప్పుడు కెసిఆర్ జాతీయవాదిగా మారాక ప్రకాష్ అంబేద్కర్ చేసిన వ్యాఖ్యల పై మాట్లాడలేక పోయారనే చర్చ సాగుతుంది. అందుకే అందరూ మౌనంగా ఉన్నారు అనే అభిప్రాయం వ్యక్తం అవుతోంది. ఆ ప్రతిపాదన వ్యతిరేకించిన ఇబ్బందులు తప్పవని కొంత మంది నేతలు అబిప్రాయపడుతున్నారు.