బిఆర్ఎస్ అంతటికి ఒక రూల్..కెటిఆర్ కు ఒక రూలా?!
అయన బిఆర్ఎస్ పార్టీ వర్కింగ్ ప్రెసిడెంట్..తెలంగాణ ప్రభుత్వంలో కీలక శాఖలు చూస్తున్న మంత్రి. కొంత మంది అధికారులు...పార్టీ నేతలు చెప్పే మాట అనధికార ముఖ్యమంత్రి అని. ఇది అంతా కెటిఆర్ గురించే. ఆయన గత కొంత కాలంగా పదే పదే ఒక మాట చెపుతూ వస్తున్నారు. గతంలో కూడా ఒక సారి చెప్పారు. మళ్ళీ తాజగా కూడా అవే మాటలు రిపీట్ చేశారు. అవేంటో ముందు ఒక సారి చూద్దాం. ‘ఓట్లు అనగానే చాలా మంది పిచ్చోళ్లు మోపతైరు. మందుపోస్తరు. పైసలు పంచుతరు. నేను నా జీవితంలో మందు పోయలేదు. పైసలు పంచలేదు. వచ్చే ఎన్నికల్లో కూడా మందుపోయ.. పైసలు పంచ.. మీ దయ ఉంటే గెలుస్తా.. లేకుంటే ఇంట్లో కూసుంట.. తప్పితే ఇలాంటి చిల్లర రాజకీయాలు చేయడం నా వల్ల కాదు’ అని మంత్రి కేటీఆర్ ప్రకటించారు. ఇంత వరకు బాగానే ఉంది. ఇందులో నిజానిజాల సంగతి కూడా కాసేపు పక్కన పెడదాం. కెటిఆర్ మాటలు చూస్తుంటే బిఆర్ఎస్ పార్టీలో తాను ఒక్కడిని తప్ప అందరూ మందు పోసి..డబ్బులు పంచి గెలుస్తున్నారు అనే చందంగా మాట్లాడుతున్నారు అనే అభిప్రాయం ఆ పార్టీ నేతల్లోనే వ్యక్తం అవుతోంది. అనధికారికంగా పార్టీని..ప్రభుత్వాన్ని నడిపిస్తున్న వ్యక్తి నోటి నుంచి ఇలాంటి మాటలు వస్తే పార్టీ ని ఇరకాటంలోకి నెడుతుంది అని ఒక సీనియర్ మంత్రి అభిప్రాయపడ్డారు. ఒక విధానం అంటూ ఉంటే పార్టీ అంతటికి ఉండాలి కానీ...కెటిఆర్ ఒక్కరే తాను మాత్రం మందు పొయను..డబ్బులు ఇవ్వను..గెలిపిస్తే గెలిపించండి లేకపోతే లేదు అని చెప్పటం అంటే ప్రజలు దీన్ని ఎలా తీసుకుంటారు అని అయన ప్రశ్నించారు.
