ముందే పదవి వదులుకుని త్యాగం చేశారా?!
పదేళ్లు సీఎం గా..నలభై ఏళ్ళపాటు రాజకీయాల్లో ఉన్న కెసిఆర్ అనాల్సిన మాటలేనా ఇవి అని అధికారులు కూడా విస్మయం వ్యక్తం చేస్తున్నారు. ఏ రాష్ట్రంలో అయినా ఎన్నికల షెడ్యూల్ వచ్చినప్పటినుంచే పరిపాలన అంతా ఎన్నికల సంఘం పరిధిలోకి వెళుతుంది. అత్యవసర పనులు చేయాలన్నా కూడా ఎన్నికల సమయంలో ఈసి అనుమతి తప్పనిసరి. అలాంటిది ఇప్పుడు కెసిఆర్ రాజ్యాంగ బద్దంగా జనవరి 16 వరకు తమ ప్రభుత్వానికి సమయం ఉంది అని చెప్పటం అంటే ఇది ప్రజలను పిచ్చోళ్లను చేయాలనే ప్రయత్నం తప్ప మరొకటి కాదు అని ఒక ఐఏఎస్ అధికారి వ్యాఖ్యానించారు. అదే నిజం అయితే మరి డిసెంబర్ నాలుగున క్యాబినెట్ సమావేశం పెడతామని ఎందుకు పెట్టలేదో అని కొంత మంది వ్యంగ్యాస్త్రాలు సంధిస్తున్నారు. ఎన్నికల ఫలితాల తర్వాత కూడా ప్రజల తీర్పును హుందాగా అంగీకరించకుండా కెసిఆర్ ఇంకా తామేదో త్యాగం చేసినట్లు మాట్లాడటం చూసి అందరూ విస్తుపోతున్నారు అనే చెప్పాలి. కెసిఆర్ తాజా వ్యాఖ్యలు చూసిన తర్వాత ఎన్నికల ఫలితాల తర్వాత కూడా అయన ఏమీ మారినట్లు లేదు అని వ్యాఖ్యానిస్తున్నారు.
