పార్లమెంట్ ఎన్నికల్లోనూ ప్రభావం తప్పదా?
ఈడీ నోటీసుల విషయంలో కవిత సుప్రీం కోర్ట్ ను ఆశ్రయించి ఈ విచారణకు దూరంగా ఉన్నారు. మరి ఇప్పుడు ఆమె 26 న సిబిఐ విచారణకు హాజరు అవుతారా లేదా అన్నది అందరిలో ఆసక్తి రేపుతోంది. ఢిల్లీ లిక్కర్ స్కాం లో ఇప్పటికే పెద్ద ఎత్తున అరెస్ట్ లు జరిగిన విషయం తెలిసిందే. ఇదే కేసు లో ఇప్పుడు ఢిల్లీ సీఎం అరవింద్ కేజ్రీవాల్ ను కూడా అరెస్ట్ చేసే అవకాశం ఉంది అని ఆప్ మంత్రులే చెపుతున్నారు. కేజ్రీవాల్ కు సిబిఐ నోటీసులు జారీ చేసే అవకాశం ఉంది అని వీళ్ళు ఆరోపణలు చేస్తున్నారు. మరి ఇప్పుడు ఈ స్కాం కేసు విషయంలో కేంద్రం, కేంద్ర ఏజెన్సీలు తీసుకునే ఏ నిర్ణయం అయినా కూడా రాజకీయంగా ప్రకంపనలు సృష్టించటం ఖాయంగా కనిపిస్తోంది. కవిత విషయంలో జరిగే పరిణామాలు మాత్రం ఖచ్చితంగా తమపై ఎంతో కొంత ప్రభావం చూపించటం ఖాయం అనే భయం తెలంగాణ బీజేపీ నేతల్లో ఉంది. లోక్ సభ ఎన్నికల కోసం బీజేపీ, బిఆర్ఎస్ లు కలిసి పోయే అవకాశం ఉంది అనే ప్రచారం జోరుగా సాగుతుంది. ఈ విషయాన్నీ రెండు పార్టీ లు ఖండిస్తున్నా కూడా ఈ విషయంలో తెరవెనక ప్రయత్నాలు జరుగుతున్నట్లు పొలిటికల్ సర్కిల్స్ లో బలంగా ప్రచారం జరుగుతోంది. ఇప్పుడు లిక్కర్ స్కాములో జరిగే పరిణామాలు కూడా రాజకీయాలపై ప్రభావం చూపించటం ఖాయం అనే చర్చ సాగుతోంది.
