మరి ఓఆర్ఆర్..తెలంగాణ భూముల విషయం!

బిఆర్ఎస్ వర్కింగ్ ప్రెసిడెంట్, మంత్రి కేటీఆర్ ఎన్నికల ముందు ప్రాస డైలాగులు బాగానే చెపుతున్నారు. తాజాగా అయన ప్రధాని మోడీ పర్యటనపై స్పందిస్తూ కెసిఆర్ అంటే నమ్మకం...మోడీ అంటే అమ్మకం అంటూ విమర్శలు గుప్పించారు. నిజమే మోడీ అమ్ముతున్నారు. మరి కెసిఆర్ అమ్మకాల సంగతేంటి?. రాజధాని హైదరాబాద్ లో వేల కోట్ల రూపాయల విలువ చేసే భూములు అమ్మి పాలనా సాగిస్తున్న మాట నిజం కాదా. ఒక్క హైదరాబాద్ నగరంలోనే కాదు తెలంగాణలోని పలు జిల్లాల్లో కూడా ఎడాపెడా భూములు అమ్ముతున్నది బిఆర్ఎస్ సర్కారు అన్న విషయం ఇక్కడి ప్రజలకు తెలియదా?. భూముల అమ్మకాలే కాదు ఏకంగా ఎక్కువశాతం తెలంగాణ రాష్ట్రం రావటానికి ముందే పూర్తి అయిన ఔటర్ రింగ్ రోడ్ (ఓఆర్ఆర్ ) ను ముప్పై ఏళ్లకు లీజ్ కు ఇచ్చి ఆ డబ్బులు వాడుకుంటున్నది ఎవరు. ఐదేళ్ల కాలానికి ఎన్నికైన ప్రభుత్వం ఇప్పటికే ప్రభుత్వ ఖజానాకు పెద్ద ఎత్తున నిధులు సమకూరుస్తున్న ప్రాజెక్ట్ ను అది కూడా ఎన్నికల ఏడాదిలో ప్రైవేట్ పరం చేయటం ఏమిటి..అది అమ్మకం కాదా?.

అన్నిటికి కంటే కీలక విషయం ఏమిటి దేశాన్ని పాలించిన బీజేపీ, కాంగ్రెస్ లకు అసలు పాలన చేతకాదు అని , తమకు ఛాన్స్ ఇస్తే అద్భుతాలు చేసి చూపిస్తాం..అమెరికా, చైనాలను దాటిస్తాం అని చెప్పే కెసిఆర్, కేటీఆర్ లు ఇక్కడ పాలన సాగించటానికి భవిష్యత్ తరాలకు అందుబాటులో ఉండాల్సిన భూములను ఎడాపెడా అమ్మేస్తూ రాజకీయ పబ్బం గడుపుకోవటం లేదా. దేశాన్నిఅంత అద్భుతంగా పాలించే ప్లానింగ్ ఉన్నప్పుడు ఇక్కడ భూములు అమ్మి, అప్పులు చేసి పాలన సాగించాల్సిన అవసరం ఏమి ఉంది. నిజంగానే కెసిఆర్, కెటిఆర్ లు చెప్పినట్లు అంత అద్భుత పాలన అందిస్తే అడగకుండానే వాళ్లకు ప్రజలు అవకాశం కలిపిస్తారు కదా. కానీ గత ప్రభుత్వాలు ఎన్నడూ చేయని రీతిలో అప్పులు చేస్తూ..భూములు అమ్ముతూ మాటలు చెపితే ఎవరైనా నమ్ముతారా. ఇక కెసిఆర్ గత పదేళ్లలో ఇచ్చిన హామీలు..విస్మరించిన వాటి జాబితా రాయాలంటే అది ఒక పెద్ద చాంతాడు అంత అవుతుంది. అయినా సరే మంత్రి కేటీఆర్ మాత్రం కెసిఆర్ అంటే నమ్మకం అని ప్రజలకు చెపుతున్నారు. ఈ మాటలు నమ్ముతారా లేదా అన్నది డిసెంబర్ లో జరిగే ఎన్నికల్లో కానీ తేలదు.