రాహుల్ గాంధీతో ప్ర‌శాంత్ కిషోర్ భేటీ
ఆస‌క్తిక‌రం. ఢిల్లీలో కీల‌క ప‌రిణామం చోటుచేసుకుంది. గ‌త కొన్ని రోజులుగా దేశంలోని కీల‌క నేతలు అంద‌రితో భేటీ అవుతున్న ఎన్నిక‌ల వ్యూహ‌క‌ర్త ప్ర‌శాంత్ కిషోర్ మంగ‌ళ‌వారం నాడు కాంగ్రెస్ అగ్ర‌నేత రాహుల్ గాంధీతో స‌మావేశం అయ్యారు. అయితే ఈ స‌మావేశం ఏజెండా ఏమిట‌నే అంశంపై స్ప‌ష్ట‌త రావాల్సి ఉంది. కొద్ది రోజుల వ్య‌వ‌ధిలోనే ప్ర‌శాంత్ కిషోర్ సీనియ‌ర్ నేత శ‌ర‌ద్ ప‌వార్ తో స‌మావేశం అయి ప‌లు అంశాలు చ‌ర్చించిన సంగ‌తి తెలిసింది.
ఇప్పుడు రాహుల్ గాంధీతో స‌మావేశం కావ‌టంతో ఈ భేటీ వెన‌క ఏజెండా ఏమి అయి ఉంటుంద‌నే అంశంపై ఆస‌క్తిక‌ర చ‌ర్చ‌లు సాగుతున్నాయి. ఈ స‌మావేశంలో ప్రియాంక గాంధీతోపాటు ప‌లువురు సీనియ‌ర్ నేతలు కూడా పాల్గొన్న‌ట్లు స‌మాచారం. అయితే కొన్ని జాతీయ ఛాన‌ళ్లు మాత్రం పంజాబ్ లో నెల‌కొన్న ప‌రిస్థితుల‌పై చ‌ర్చించేందుకే ఈ స‌మావేశం అని చెబుతున్నాయి. పంజాబ్ లోని కాంగ్రెస్ సీఎం అమ‌రీంద‌ర్ సింగ్ కు ఆయ‌న స‌ల‌హాదారుగా వ్య‌వ‌హ‌రిస్తున్న విష‌యం తెలిసిందే.
