వైసీపీ లో భారీ కుదుపులు తప్పవా?
టీడీపీ, జనసేన పొత్తు ఆ పార్టీలకు ఒక సానుకూల అంశం అయితే...ఇప్పుడు కొత్తగా ప్రముఖ ఎన్నికల వ్యూహకర్త ప్రశాంత్ కిషోర్ ఎంట్రీ కూడా టీపీడీ, జనసేన కూటమికి కొంతమేర ఉపయోగపడే అవకాశం ఉంది అనే అంచనాలు ఉన్నాయి. ఈ కారణంగానే వైసీపీ మంత్రులు, పార్టీ నేతలు ప్రశాంత్ కిషోర్ ఇష్యూపై పెద్ద ఎత్తున విమర్శలు చేస్తున్నారు. వైసీపీ ఇప్పటికి ఐ ప్యాక్ సేవలు పొందుతున్న విషయం తెలిసిందే. ఆంధ్ర ప్రదేశ్ లోని జగన్ సర్కారు పై ఇప్పటికే వివిధ వర్గాల్లో వ్యతిరేకత ఉండటం ఒకటి అయితే...జగన్ టిక్కెట్ల విషయంలో చేస్తున్న మార్పులు కూడా పార్టీలో పెద్ద కుదుపులకు కారణం అయ్యే అవకాశం ఉంది అని చెపుతున్నారు. మంగళగిరి నియోజకవర్గానికి కొత్త ఇంచార్జి ని నియమిస్తున్నట్లు సమాచారం వచ్చిన వెంటనే సీఎం జగన్ కు ఎంతో సన్నిహితుడిగా పేరున్న ఆళ్ల రామకృష్ణ రెడ్డి ఎమ్మెల్యే పదవితో పాటు వైసీపీ కి కూడా రాజీనామా చేసి షాక్ ఇచ్చారు. జగన్ అధికారికంగా తన నిర్ణయాలు ప్రకటించిన తర్వాత చాలా మంది ఇదే మార్గాన్ని ఎంచుకుంటారు అని చెపుతున్నారు. అయితే ఈ సంఖ్య ఏ స్థాయిలో ఉంటుందో చూడాల్సిందే. కారణాలు ఏమైనా అధికార పార్టీ నుంచి పెద్ద ఎత్తున నాయకులు ఎన్నికలకు ముందే ఇతర పార్టీల్లో చేరితే అది ప్రజలు తప్పుడు సంకేతాలు పంపే అవకాశం ఉంది అనే టెన్షన్ వైసీపీ నేతల్లో ఉంది.
