వర్మ సినిమాల నిర్మాతకు టీటీడీ బోర్డు పదవి

రాంగోపాల్ వర్మ సినిమాల నిర్మాత దాసరి కిరణ్ కుమార్ కు అత్యంత కీలకమైన టిటిడీ బోర్డు సభ్యుడు గా నియమితులు అయ్యారు. కొద్ది రోజుల క్రితం వర్మ అకస్మాత్తుగా అమరావతి లో సీఎం జగన్ తో భేటీ అయ్యారు. వెంటనే తాను రెండు రాజకీయ సినిమాలు తీస్తున్నట్లు ప్రకటించారు. అందులో ఒకటి వ్యూహం అయితే రెండవది శపధం అన్నారు ఈ రెండూ కూడా పక్కా రాజకీయాలకు సంబంధించినవే అని తెలిపారు. తర్వాత వీటిపై వర్మ వరస ట్వీట్లు కూడా చేశారు. ఈ సినిమాలకు నిర్మాత గా దాసరి కిరణ్ కుమార్ ఉంటారని కూడా చెప్పారు. ఈ దాసరి కిరణ్ కుమార్ కే జగన్ సర్కారు టీటీడీ బోర్డు పదవి కట్టబెట్టింది. అంటే ఇక్కడ ఒక విషయం స్పష్టంగా కనిపిస్తోంది. వచ్చే ఎన్నికల్లో వైసీపీ కి ప్రయోజనం కలిగించేలా (వస్తదా రాదా అన్నది వేరే సంగతి ) ఈ సినిమాలు తీస్తున్నారు అన్నది మాత్రం స్పష్టం.

దీనికి ఎంతో కీలకమైన టీటీడీ ని వాడుకుంటున్నారు. అయితే ఇలా మొదటి సారి జరిగింది అని చెప్పటానికి లేదు. ఎందుకు అంటే ఎవరు అధికారంలో ఎవరు ఉంటే వాళ్ళు అలాగే చేస్తున్నారు. గతంలో టీడీపీ అధినేత చంద్రబాబు నాయుడు కూడా అదే పని చేశారు. ఇప్పుడు జగన్ కూడా అదే లైన్ లో ఉన్నారు. టీడీపీ ఎన్నికల ప్రచారానికి సంబదించిన పాటలు...యాడ్స్ తయారీ వంటి వాటి విషయంలో సహకరించినందుకు దర్శకుడు రాఘవేందర్ రావు కు అప్పట్లో చంద్రబాబు టిటిడీలో పలు పదవులు కట్టబెట్టారు. ఇప్పుడు వైసీపీ అధినేత, సీఎం జగన్ కూడా తన కోసం సినిమాలకు నిర్మాతగా వ్యవహరించనున్న కిరణ్ కుమార్ కు టీటీడీ పదవి కట్టబెట్టారు. రాంగోపాల్ వర్మ దేవుడిని నమ్మను అని చెపుతారు కాబట్టి సరిపోయింది లేకపోతే టీటీడీ లో ఆయనకు ఏదో ఒక పదవి దక్కేది అంటూ కొంత మంది వ్యంగ్యాస్త్రాలు సంధిస్తున్నారు.