పిఠాపురం..ఈ సారి ప్రత్యేకం

ఆంధ్ర ప్రదేశ్ అసెంబ్లీ ఎన్నికల్లో అందరి దృష్టిని ఆకర్షించిన నియోజకవర్గాల్లో పిఠాపురం ఒకటి. జన సేన అధినేత పవన్ కళ్యాణ్ ఇక్కడ నుంచి పోటీ చేయటమే దీనికి ప్రధాన కారణం. అధికార వైసీపీ నుంచి ఇక్కడ వంగా గీత బరిలో ఉన్నారు...ఎలాగైనా సరే పవన్ అసెంబ్లీలోకి అడుగుపెట్టకుండా చేసేందుకు అధికార వైసీపీ తన వంతు ప్రయత్నాలు గట్టిగానే చేసింది. అయితే అవేమి పెద్దగా ఫలించినట్లు కనిపించటం లేదు అనే అభిప్రాయం సర్వత్రా వ్యక్తం అవుతోంది. పవన్ టార్గెట్ గా అధికార పార్టీ భారీ ఎత్తున నిధులు కుమ్మరించినట్లు కూడా ఆరోపణలు వచ్చాయి. అయితే అధికార పార్టీ ని ఢీకొట్టేందుకు జన సేన కూడా ఈ విషయంలో ఏ మాత్రం వెనక్కు తగ్గలేదు అని చెపుతున్నారు. గతంలో ఎన్నడూ లేని రీతిలో పిఠాపురం నియోజకవర్గంలో ఈ సారి ఓటింగ్ రికార్డు స్థాయిలో 86.63 శాతం నమోదు అయింది. ఈ లెక్కలు అన్ని చూస్తుంటే పవన్ కళ్యాణ్ గెలవటమే కాదు..భారీ మెజారిటీతో విజయం సాధిస్తారు అనే అంచనాలు ఉన్నాయి. ఈ అసెంబ్లీ ఎన్నికల్లో నమోదు అయిన పోలింగ్ శాతం తో పాటు పలు అంశాలు పరీశీలిస్తే ఆంధ్ర ప్రదేశ్ ఎన్నికలు టీడీపీ, జన సేన, బీజేపీ కూటమి గెలుపు ఖాయంగా కనిపిస్తోంది అనే అంచనాలు ఉన్నాయి. పొత్తులో భాగంగా ఈ ఎన్నికల్లో జన సేన కేవలం 21 అసెంబ్లీ సీట్లలోనే పోటీ చేసిన విషయం తెలిసిందే.

దీనిపై సొంత పార్టీ నాయకుల నుంచి కూడా అసంతృప్తి వెల్లువెత్తగా....ప్రభుత్వం అధికారంలోకి వచ్చిన తర్వాత అందులో భాగస్వాములం అవుతామని..అందరికి న్యాయం చేస్తామని పవన్ కళ్యాణ్ ప్రకటించిన విషయం తెలిసిందే. ఇప్పుడు ఉన్న అంచనాల ప్రకారం కూటమి ప్రభుత్వం ఏర్పాటు చేస్తే పవన్ కళ్యాణ్ కు గ్యారంటీగా ఉప ముఖ్యమంతి పదవి ఖాయం అనే అభిప్రాయం అటు టీడీపీ తో పాటు జన సేన వర్గాల్లో కూడా ఉంది. ఇది ఇలా ఉంటే..ఎన్నికల ప్రచారం లో చివరి రోజు పిఠాపురం లో వైసీపీ అభ్యర్థి వంగా గీత తరపున ప్రచారం చేసిన వైసీపీ అధినేత, ముఖ్యమంత్రి జగన్ మోహన్ రెడ్డి కీలక ప్రకటన చేసిన విషయం తెలిసిందే. పిఠాపురంలో వంగా గీతను గెలిపిస్తే తన క్యాబినెట్ లో ఉప ముఖ్యమంత్రి ఇస్తానని ప్రకటించారు. ఈ లెక్కన టీడీపీ కూటమి గెలిచినా...వైసీపీ తిరిగి అధికారంలోకి వచ్చినా కూడా పిఠాపురానికి మాత్రం ఉప ముఖ్యమంత్రి పదవి మాత్రం ఖాయం అని చెప్పొచ్చు. అయితే జగన్ గతంలో ఇలాగే మంగళగిరిలో నారా లోకేష్ ను ఓడించిన ఆళ్ల రామకృష్ణా రెడ్డి కి మంత్రి పదవి ఇస్తానని హామీ ఇచ్చి హ్యాండ్ ఇచ్చిన విషయం తెలిసిందే. ఇది ఒక్కటే కాదు...ఇలాంటి హామీలు మరికొన్ని ఇచ్చి కూడా జగన్ వాటిని అమలు చేయలేదు. మరి రాబోయే రోజుల్లో ఏమి జరుగుతుందో చూడాలి.