ఏపీలోనూ తెలంగాణ ఫలితాల టెన్షన్ !
ఎంతో అనుభవం ఉన్న జగన్ తండ్రి, దివంగత సీఎం రాజశేఖర్ రెడ్డి సీఎం గా ఉన్న సమయంలో ప్రజాదర్భార్ పెట్టి ప్రజలను నిత్యం కలిసే వాళ్ళు. కానీ జగన్ మాత్రం తన తండ్రి మోడల్ కాకుండా కెసిఆర్ మోడల్ ను ఎంచుకున్నారు. అటు ఎమ్మెల్యేలను..ఇటు ప్రజలను కలవకుండా ఒక సీఎం పరిపాలన సాగించటం అంటే అంతకంటే దారుణం మరొకటి ఉండదు అనే చెప్పొచ్చు. ఇవి అన్నీ సీఎం వ్యవహారశైలికి సంబదించిన విషయాలు అయితే ఇక ఆంధ్ర ప్రదేశ్ లో నెలకొన్న పరిస్థితులు ఏవీ అంత ఆశాజనకంగా లేవనే చెప్పొచ్చు. ఉద్యోగుల విషయంలో కూడా జగన్ సర్కారు పలు అంశాల్లో వాళ్ళను ఇబ్బందులకు గురిచేస్తోంది అనే విమర్శలు ఉన్నాయి. గత కొన్ని నెలలుగా తెలుగు దేశం అధినేత చంద్రబాబు నాయుడిపై పెట్టిన కేసు లు మెరిట్ ఆధారంగా పెట్టారు అనటం కంటే రాజకీయ టార్గెట్ గా పెట్టినట్లు ప్రభుత్వ వ్యవహార శైలి చూస్తే అర్ధం అవుతుంది. మరో వైపు రాజధాని అంశంలో గందరగోళం..పోలవరం అటకెక్కటం, రాష్ట్రంలో రహదారులు దారుణంగా ఉండటం..కొంత మంది ఎమ్మెల్యే ల తీరు తీవ్ర విమర్శలకు కారణం అవుతున్న వేళ అధికార వైసీపీ పై వ్యతిరేకత పెరుగుతున్నట్లు కనిపిస్తోంది. ఇవన్నీ కలిపి చూస్తే వచ్చే ఎన్నికల్లో వైసీపీ గెలుపు అంత ఈజీ గా ఉండదు అని చెప్పుకోవచ్చు. ఖచ్చితంగా తెలంగాణ ఎన్నికల ప్రభావం ఆంధ్ర ప్రదేశ్ పై ఎంతో కొంత ఉండటం ఖాయం అనే అభిప్రాయం పలు వర్గాల్లో ఉంది.
