రంగబలి హిట్టా... బ్లాక్ బస్టరా !

కమెడియన్ సత్య ఈ సినిమా ప్రమోషన్స్ కోసం టీవీ సెలబ్రిటీల పేరుతో చేసిన స్పూఫ్ ఇంటర్వ్యూలు రంగబలిపై అంచనాలు పెంచాయి. ఇతర ప్రమోషన్స్ కంటే ఇవే పేలాయి . ఈ సినిమా హీరో నాగ శౌర్య గతంలో ఎన్నడూ లేని రీతిలో ఈ సారి హిట్ కాదు..గ్యారంటీగా బ్లాక్ బస్టర్ కొడతాం అంటూ చాలా ధీమా చూపించారు. గత కొంత కాలంగా నాగ శౌర్య సినిమాలు బాక్స్ ఆఫీస్ వద్ద విజయం సాధించలేకపోతున్న విషయం తెలిసిందే. కానీ ఈ సారి మాత్రం ఎంతో కాన్ఫిడెంట్ గా రంగబలి తో ప్రేక్షకుల ముందుకు వచ్చాడు. సినిమా కథ విషయానికి వస్తే ఇది అంతా ఒక ఊరు...ముగ్గురు ఫ్రెండ్స్ చుట్టూ తిరిగే కథే. ఏది చేసినా ఊరిలోనే తప్ప...బయటకు ఎక్కడికి వెళ్ళేది లేదు అనే కాన్సెప్ట్ తో ఉంటాడు హీరో నాగ శౌర్య. అయితే అదే ఊరిలో తండ్రి నడిపే మెడికల్ షాప్ చూసుకునేందుకు పెండింగ్ పడిన ఫార్మసీ కోర్స్ పూర్తి చేసేందుకు వైజాగ్ వెళ్తాడు. అది పూర్తి అయినా తర్వాత మళ్ళీ ఊళ్లోకి వచ్చి షాప్ చూసుకోవాలని ప్లాన్ వేస్తాడు. వైజాగ్ వెళ్లిన తర్వాత అక్కడ మెడికల్ కాలేజీ లో ఒక డాక్టర్ గా ఉన్న హీరోయిన్ యుక్తి తరేజా తో ప్రేమలో పడతాడు. ఈ ప్రేమ కు హీరో సొంత ఊరు రాజవరంలో ఉన్న రంగబలి సెంటర్ కు ఉన్న సంబంధం ఏమిటి..ఈ సెంటర్ పేరు కారణంగా హీరో ప్రేమకు ఎదురైన సమస్యలు ఏమిటి అన్నదే ఈ సినిమా. సింపుల్ స్టోరీ ని ఆసక్తి కరంగా మలచడంలో దర్శకుడు పవన్ బాసంశెట్టి విజయవంతం అయ్యారు అని చెప్పొచ్చు. ఈ సినిమాకు కథ అందించింది కూడా ఆయనే. హీరో నాగ శౌర్య కు ఈ తరహా పాత్రలు అలవాటు అయినవే కావటంతో అలవోకగా చేశాడు అనే చెప్పాలి. ఫైట్స్ లో ఎలివేషన్స్ డోస్ కాస్త పెంచినట్లు కనిపిస్తుంది.

రంగబలి సినిమా బలం అంతా ఫస్ట్ హాఫ్ అనే చెప్పాలి. ఎలాగైతే టీవీ సెలెబ్రిటీల స్పూఫ్ ఇంటర్వ్యూలతో దుమ్మురేపాడో సినిమాలో కూడా సత్య తన కామెడీ పాత్రతో...ఎవరైనా సంతోషంగా ఉంటే ఏ మాత్రం తట్టుకోలేని అగాధం క్యారెక్టర్ లో అదరగొట్టాడు. ఒక్క మాటలో చెప్పాలంటే ఫస్ట్ హాఫ్ లో హీరో ను తన కామెడీతో డామినేట్ చేశాడు. సెకండ్ హాఫ్ లో కామెడీ తగ్గినా ఎక్కడా స్టోరీ గాడి తప్పకుండా చేసుకోవటంలో దర్శకుడు విజయం సాధించాడు. హీరో నాగ శౌర్య ప్రేమ కు...రంగబలి సెంటర్ కు లింక్ పెట్టిన విధానం, క్లైమాక్స్ లో అసలు ఆ సెంటర్ కు ఈ పేరు ఎలా వచ్చింది రివీల్ చేసినా విధానం కూడా ఆకట్టుకుంది. పాత్ర చిన్నదే అయినా శరత్ కుమార్ తెరపై ఉన్నంత సేపు ఇంపాక్ట్ చూపించారు. హీరోయిన్ యుక్తి తరేజా ఆకట్టుకుంది. అయితే ఆమె పాత్ర ప్రాధానత్య పెద్దగా లేదు అనే చెప్పాలి. దర్శకుడు ఒక పక్క సినిమా కథ గాడి తప్పకుండా నడుపుతూనే ఎంత మంచి చేసినా ఎప్పుడైనా...ఎక్కడైనా చిన్న తప్పు జారితే మాత్రం అంతకు ముందు చేసిన మంచి అంతా మర్చి పోయి ఆ తప్పునే ప్రజలు పట్టుకుని వేలాడుతారు అని చెప్పిన విధానం కూడా బాగుంది. మొత్తం మీద రంగబలి సినిమా హీరో నాగ శౌర్య చెప్పినట్లు బ్లాక్ బస్టర్ కాకపోయినా ఖచ్చితంగా హిట్ అనే చెప్పొచ్చు.

రేటింగ్: 3 -5