టాలీవుడ్ లో హాట్ టాపిక్ గా మిస్టర్ బచ్చన్ డైలాగులు

టాలీవుడ్ లో ప్రముఖ దర్శకుడు త్రివిక్రమ్ శ్రీనివాస్ ను చాలా మంది గురూజీ గురూజీ అని పిలుస్తారు. అంతే కాదు ఆయన రాసే డైలాగులు చాలా మందికి నచ్చుతాయి. దీంతో మరికొంత మంది ఆయన్ను మాటల మాంత్రికుడిగా కూడా అభివర్ణిస్తారు. సినీ అభిమానులకు చాలా మందికి ఈ విషయం తెలుసు. ఇప్పుడు ఇది అంతా ఎందుకు అంటే ఆగస్ట్ 15 న విడుదల అయిన హరీష్ శంకర్, రవి తేజ లో కొత్త సినిమాలో త్రివిక్రమ్ శ్రీనివాస్ ను టార్గెట్ చేశారు అనే చర్చ పరిశ్రమ వర్గాల్లో నడుస్తోంది. ఒక రకంగా చెప్పాలంటే త్రివిక్రమ్ శ్రీనివాస్ పై మరో దర్శకుడు హరీష్ శంకర్ తన కసి తీర్చుకున్నట్లు ఉంది అనే అభిప్రాయాన్ని కూడా చాలా మంది వ్యక్తం చేస్తున్నారు. దీనికి ప్రధాన కారణం మిస్టర్ బచ్చన్ సినిమాలో ప్రభాస్ శ్రీను, చమ్మక్ చంద్ర ల మధ్య వచ్చే సన్నివేశాలే. ఈ సినిమాలో పెద్ద ఎత్తున అక్రమ సంపాదన కూడ బెట్టిన రాజకీయ నాయకుడు జగపతిబాబు కొడుకు పాత్రలో చమ్మక్ చంద్ర కనిపిస్తాడు.

చమ్మక్ చంద్రా ను టాప్ హీరో ను చేస్తాను అని చెపుతూ ప్రభాస్ శ్రీను వాళ్ళ ఇంట్లోనే తిరుగుతుండటం...పదే పదే గురూజీ గురూజీ అని సంబోధిస్తూ ఉంటాడు. చమ్మక్ చంద్రా ఏమి చేయాలన్నా అందుకు ప్రభాస్ శ్రీను ఆదేశాలు ఉండాల్సిందే. ఈ సినిమాలో ఒక్క గురూజీ డైలాగుల వరకు పరిమితం అయితే ఈ విషయంలో పెద్దగా ఎవరికీ ఎలాంటి అనుమానాలు కూడా వచ్చి ఉండేవి కావు. కానీ ఇదే సినిమాలో హీరో రవి తేజ తో కూడా దర్శకుడు హరీష్ శంకర్ నేను మాటల మాంత్రికుడిని కాదు...మ్యాటర్ ఉన్న మాంత్రికుడిని అనే డైలాగు చెప్పించారు. దీంతో ఇది ఖచ్చితంగా త్రివిక్రమ్ శ్రీనివాస్ ను టార్గెట్ చేసి పెట్టిన డైలాగులే అన్న చర్చ టాలీవుడ్ వర్గాల్లో సాగుతోంది.