పూరి ఈ మూవీ తో అయినా హిట్ కొడతాడా!

ఒకరు వరస విజయాలతో దూసుకెళుతున్న హీరో. ఒక్క హీరో పాత్రలే కాకుండా ఏ అవకాశం వచ్చినా కూడా పాత్ర నచ్చితే దానికి ఓకే చెపుతూ ముందుకు వెళుతున్నాడు. ఆయనే తమిళ నటుడు విజయ్ సేతుపతి. మరో వైపు గత కొన్ని సంవత్సరాలుగా సరైన హిట్ లేక ఇబ్బంది పడుతున్న దర్శకుడు పూరీ జగన్నాథ్. కొద్ది నెలల క్రితమే వీళ్లిద్దరి కాంబినేషన్ లో సినిమా ప్రకటించిన విషయం తెలిసిందే. ఇప్పటికే ఈ మూవీ షూటింగ్ కూడా దాదాపు పూర్తి అయింది. శుక్రవారం నాడు పాన్ ఇండియా స్థాయిలో విడుదల చేయనున్న ఈ మూవీ టైటిల్ ని ప్రకటించటంతో పాటు ఇందులో విజయ్ సేతుపతి ఫస్ట్ లుక్ ను కూడా విడుదల చేశారు.

ఈ మూవీ కి స్లమ్ డాగ్ అనే టైటిల్ ఫిక్స్ చేశారు. దీనికి ఉప శీర్షికగా 33 టెంపుల్ రోడ్ అని పెట్టారు. ఈ ఫస్ట్ లుక్ తో పాటు మురికి వాడల నుంచి ఎవరూ తట్టుకోలేని తుఫాను వస్తుంది. అది చాలా భయంకరంగా ఉంటుంది అని ఈ పోస్టర్ తో పాటు షేర్ చేశారు. ఈ సినిమాకి హర్ష వర్ధన్ రామేశ్వర్ సంగీతం అందిస్తుంటే... పూరి జగన్నాథ్, ఛార్మీలే ఈ సినిమాకు నిర్మాతలుగా వ్యవహరిస్తున్నారు. ఈ సినిమా తెలుగు తో పాటు తమిళ్, హిందీ, కన్నడ, మలయాళం భాషల్లో విడుదల కానుంది. తమిళ హీరోతో చేస్తున్న ఈ సినిమా అయినా పూరీ జగన్నాథ్ కు హిట్ ఇస్తుందో లేదో చూడాలి.