దసరా రేస్ లో విజేత ఎవరో!

పండగలను టార్గెట్ చేసుకుని పెద్ద హీరోల సినిమాల విడుదల ప్లాన్ చేయటం టాలీవుడ్ లో కొత్తేమి కాదు. ఇది ఎప్పటి నుంచో ఉంది. అలాగే ఈ దసరాకు పలు సినిమాలు ప్రేక్షకుల ముందుకు రాబోతున్నాయి. అయితే ఇందులో రెండు స్ట్రెయిట్ సినిమాలు ఉంటే ..మరొకటి తమిళ్ హీరో విజయ్ నటించిన లియో సినిమా ఒకటి. పండగల సమయంలో ఒక్కోసారి ఈ పోటీ మరీ ఎక్కువగా ఉంటుంది. సంక్రాంతి...దసరా...క్రిస్మస్ సెలవులు టార్గెట్ చేసుకుని టాప్ హీరోల సినిమాలు విడుదల అవుతూ ఉంటాయి. ఈ ఏడాది సంక్రాంతి బరిలో చిరంజీవి, రవి తేజ లు కలిసి నటించిన వాల్తేరు వీరయ్య, బాలకృష్ణ హీరోగా నటించిన వీర సింహారెడ్డి సినిమాలు విడుదల అయి బాక్స్ ఆఫీస్ వద్ద మంచి విజయాన్ని దక్కించుకున్నాయి. ఇప్పుడు మరో పెద్ద పండగ దసరాకు కూడా నందమూరి బాలకృష్ణ బరిలో నిలిచారు. దర్శకుడు అనిల్ రావిపూడి, బాలకృష్ణ కాంబినేషన్ లో తెరకెక్కిన భగవంత్ కేసరి ప్రేక్షకుల ముందుకు రానుంది. వీళ్లిద్దరి కాంబినేషన్ ఇదే తొలిసారి. అక్టోబర్ 19 న విడుదల కానున్న ఈ సినిమాలో బాలకృష్ణ కు జోడిగా కాజల్ అగర్వాల్ నటిస్తే...మరో కీలక పాత్రలో టాలీవుడ్ లో దూసుకువెళ్తున్న శ్రీ లీల నటించిన విషయం తెలిసిందే. భగవంత్ కేసరి విడుదల రోజే మరో పెద్ద సినిమా లియో కూడా విడుదల అవుతుంది.

ఇందులో తమిళ హీరో విజయ్ నటిస్తే...ప్రముఖ దర్శకుడు లోకేష్ కానగరాజ్ ఈ సినిమాను తెరకెక్కించారు. దీంతో ఈ సినిమాపై కూడా పెద్ద ఎత్తున అంచనాలు ఉన్నాయి. అక్టోబర్ 20 న మాస్ మహారాజ రవి తేజ నటించిన టైగర్ నాగేశ్వర్ రావు విడుదల కానుంది. స్టువర్ట్ పురం దొంగ టైగర్ నాగేశ్వర్ రావు జీవిత కథ ఆధారంగా తెరకెక్కిన ఈ సినిమా ట్రైలర్ మూవీ పై అంచనాలను పెంచింది అనే చెప్పాలి. రవి తేజ నటించిన తొలి పాన్ ఇండియా సినిమా ఇది. ఈ మూవీ తెలుగు తో పాటు హిందీ, తమిళ్, మలయాళం, కన్నడ భాషల్లో విడుదల కానుంది. వంశీ దర్శకత్వంలో ఈ మూవీ తెరకెక్కింది. బాలకృష్ణ భగవంత్ కేసరి సినిమా ద్వారా హ్యాట్రిక్ విజయం అందుకోవాలని టార్గెట్ గా పెట్టుకున్నారు. అయన నటించిన అఖండ, వీరసింహ రెడ్డి మంచి హిట్స్ అందుకున్నాయి. మరి అనిల్ రావిపూడి బాలకృష్ణకు హ్యాట్రిక్ విజయం అందిస్తారో లేదో అక్టోబర్ 19 న తేలనుంది.