అల్లరి నరేష్ కొత్త మూవీ అమెజాన్ ప్రైమ్ లో

ఒకప్పుడు కామెడీ సినిమాలకే పరిమితం అల్లరి నరేష్ తర్వాత జానర్ మార్చి సీరియస్ సినిమాలు కూడా చేశాడు. వీటిలో కొన్ని విజయం సాధించాయి...మరి కొన్ని సో సో గా నడిచాయి. ఇటీవల మళ్ళీ తనకు కలిసి వచ్చిన కామెడీ జానర్ నే నమ్ముకుని రంభ, ఊర్వశి, మేనక సినిమాతో సెప్టెంబర్ 4 న ప్రేక్షకుల ముందుకు వచ్చాడు. అయితే ఈ సినిమా బాక్స్ ఆఫీస్ దగ్గర ఆశించిన ఫలితాన్ని దక్కించుకోలేక పోయింది. ఇందులో అల్లరి నరేష్ కు జోడీగా సురభి నటిస్తే ...టైటిల్ రోల్స్ రంభ..ఊర్వశి, మేనక పాత్రల్లో రాశి సింగ్, విష్ణు ప్రియా, ప్రిషా సింగ్ లు నటించారు. బాక్స్ ఆఫీస్ దగ్గర అంతగా ఆకట్టుకోలేక పోయిన ఈ సినిమా ఇప్పుడు ఎలాంటి హడావుడి లేకుండా ఓటిటి లోకి వచ్చేసింది.

దర్శకుడు చింతాడ చంద్ర మోహన్ తెరకెక్కించిన ఈ సినిమా ఇప్పుడు ప్రముఖ ఓటిటి అమెజాన్ ప్రైమ్ లో స్ట్రీమింగ్ అవుతోంది. ఈ మూవీకి చైతన్ భరద్వాజ్ సంగీతం అందించగా, రాజేష్ దండ, ప్రసాద్ నిమ్మకాయల సంయుక్తంగా ఈ ఫాంటసీ ఎంటర్టైనర్ ను నిర్మించారు. హీరో తన దగ్గర ఉన్న మేజిక్ బుక్ లో ఉన్న పజిల్ ను క్రాక్ చేస్తే రంభ, ఊర్వశి, మేనకలు కిందకు దిగి వచ్చి తాను కోరుకున్న వరాలు అన్ని ఇస్తాడు అని గట్టిగా నమ్ముతాడు. ఆ దిశగా ప్రయత్నం చేస్తాడు. దీని కోసం ఇంట్లో వాళ్ళు విగ్రహాలు పెట్టి మరీ నిత్యం పూజలు చేస్తాడు. హీరో పూజలు ఫలించి కిందకు వచ్చిన రంభ, ఊర్వశి, మేనక లు హీరో కల నిజం చేశారా లేదా అన్నదే ఈ మూవీ.