120 దేశాల్లో విడుదల!

దర్శకుడు రాజమౌళి నుంచి కొత్త సినిమా ప్రకటన వచ్చింది అంటే చాలు ఆ సినిమాపై అంచనాలు అలా పెరుగుతాయి. దీనికి ప్రధాన కారణం ఆయనకున్న ట్రాక్ రికార్డు అనే చెప్పాలి. ఎందుకంటే రాజమౌళి ఇప్పటి వరకు తెరకెక్కించిన సినిమాలు అన్నీ కూడా దేశ వ్యాప్తంగా సంచలన విజయాలు నమోదు చేసుకోవటమే కాదు...వసూళ్ల విషయంలో కూడా అంతే సంచలనాలు నమోదు చేశాయి. అందులోనూ మహేష్ బాబు తో కొత్త సినిమా ప్రకటించటంతో ఇది ఇప్పుడు దేశ వ్యాప్తంగా అందరిలో ఆసక్తి రేపుతోంది. అంతే కాదు ఈ సినిమా ప్రపంచ వ్యాప్తంగా అంటే ఏకంగా 120 దేశాల్లో ఈ సినిమాను రిలీజ్ చేసేందుకు రాజమౌళి ప్లాన్ చేస్తున్నట్లు చెపుతున్నారు. అదే జరిగితే ఇది రాజమౌళి సృష్టించిన మరో రికార్డు గా మారుతుంది కూడా.

రాజమౌళి ఏ సినిమా ప్రకటించినా కూడా ఆయన ఆ ప్రాజెక్ట్ ను పూర్తి చేయటానికి దగ్గర దగ్గర రెండు నుంచి రెండున్నర సంవత్సరాల సమయం తీసుకుంటారు అనే అభిప్రాయం అందరిలో ఉంది. ఇందులో చాలా వరకు వాస్తవం కూడా ఉంది. రాజమౌళి. మహేష్ బాబు కాంబినేషన్ లో సినిమా ప్రారంభం అయి ఇప్పటికే ఏడాది పైనే అయింది. దీంతో ఈ సినిమా విడుదల ఎప్పుడు ఉంటుందా అన్న చర్చ గత కొన్ని రోజులుగా సాగుతోంది. వీటి అన్నిటికి చెక్ పెడుతూ దర్శకుడు రాజమౌళి వారణాసి మూవీ విడుదల తేదీని అధికారికంగా ప్రకటించారు. దీని ప్రకారం మహేష్ బాబు హీరోగా ..ప్రియాంక చోప్రా హీరోయిన్ గా తెరకెక్కుతున్న ఈ మూవీ వచ్చే ఏడాది అంటే 2027 ఏప్రిల్ 7 న విడుదల కానుంది.

ఈ సినిమాలో మహేష్ బాబు రుద్ర పాత్రలో కనిపించనున్నారు. కొద్ది రోజుల క్రితం నిర్వహించిన ఒక ఈవెంట్ లో ఈ విషయాన్ని వెల్లడించిన సంగతి తెలిసిందే. కె ఎల్ నారాయణ నిర్మాతగా వ్యవరిస్తున్న ఈ సినిమాలో మరో కీలక పాత్రలో పృద్వి రాజ్ సుకుమారన్ నటిస్తున్న విషయం తెలిసిందే. భారీ బడ్జెట్ తో తెరకెక్కుతున్న ఈ మూవీ వసూళ్లు కూడా కొత్త రికార్డు లు నమోదు చేసే అవకాశం ఉంది అనే అంచనాలు ఉన్నాయి. చిత్ర యూనిట్ వారణాసి సినిమా విడుదలకు 2027 ఏప్రిల్ 7 తేదీని ఎంచుకోవటం వెనక కూడా పక్కా వ్యూహం ఉంది అని చెపుతున్నారు. ఎందుకంటే వివిధ పండగలకు సంబంధించి ఆ సమయంలో వరస సెలవులు కూడా ఉన్నాయి. ఇది అంతా కలిసి వస్తుంది అనే కోణంలోనే ఈ డేట్ ను ఎంచుకున్నట్లు చెపుతున్నారు.