రామ్ చరణ్ కెరీర్ బెస్ట్ రికార్డ్!

రామ్ చరణ్ పెద్ది మూవీ మరో కొత్త రికార్డు నమోదు చేసింది. విడుదల అయిన 12 రోజుల్లోనే ఈ సినిమా ప్రపంచ వ్యాప్తంగా 400 కోట్ల రూపాయల గ్రాస్ వసూళ్లను సాధించింది. చిత్ర యూనిట్ అధికారికంగా ఈ విషయాన్ని వెల్లడిస్తూ రామ్ చరణ్ న్యూ లుక్ ను విడుదల చేసింది. 2026 సంవత్సరంలో దక్షిణ భారత దేశంలో నంబర్ వన్ గ్రాసర్ గా ఈ మూవీ నిలిచినట్లు వెల్లడించారు. రామ్ చరణ్ సోలో హీరోగా నటించిన సినిమా ఒకటి 400 కోట్ల రూపాయల క్లబ్ లో చేరటం ఇదే మొదటి సారి. 300 కోట్ల రూపాయల వసూళ్లే ఒక రికార్డు అయితే..ఇప్పుడు ఇది 400 కోట్ల రూపాయలకు చేరటంతో మెగా ఫ్యాన్స్ ఫుల్ జోష్ లో ఉన్నారు అనే చెప్పొచ్చు. అయితే థియేట్రికల్ రన్ పూర్తి అయ్యే నాటికి వసూళ్లు ఎంత మేరకు చేరతాయి అన్నది ఇప్పుడు ఆసక్తికరంగా మారింది.

దర్శకుడు బుచ్చిబాబు సానా తెరక్కించిన రెండవ సినిమానే ఏకంగా 400 కోట్ల రూపాయల క్లబ్ లో చేరటంతో ఆయన కూడా ఫుల్ జోష్ లో ఉన్నారు. ఈ సినిమాలో రామ్ చరణ్ కు జోడిగా జాన్వీ కపూర్ నటించిన సంగతి తెలిసిందే. అయితే ఈ సినిమాలో రామ్ చరణ్ నటనకు పెద్ద ఎత్తున ప్రశంసలు రాగా...జాన్వీ కపూర్ రోల్ విషయంలో పెద్ద ఎత్తున విమర్శలు వ్యక్తం అయ్యాయి. చివరకు ఈ విషయంలో దర్శకుడు క్షమాపణ చెప్పి..కొన్ని సన్నివేశాలు తొలగిస్తున్నట్లు కూడా ప్రకటించారు. పెద్ది మూవీ లో జగపతిబాబు, శివరాజ్ కుమార్ లు కీలక పాత్రలు పోషించారు. పెద్ది మూవీ విషయంలో ప్రేక్షకుల నుంచి మిశ్రమ స్పందనలు వ్యక్తం అయినా కూడా ఈ మూవీ వసూళ్లు 400 కోట్ల రూపాయలను అధిగమించటం విశేషం.