మరో సారి సంక్రాంతి బరిలో బాలకృష్ణ

బాలకృష్ణ ఫ్యాన్స్ ఎప్పుడెప్పుడా అని ఎదురుచూస్తున్న అప్డేట్ వచ్చేసింది. ఆయన 109 వ సినిమా టైటిల్, టీజర్ ను నవంబర్ 15 ఉదయం 10 .24 గంటలకు ప్రకటించబోతున్నారు. ఈ విషయాన్ని చిత్ర యూనిట్ అధికారికంగా వెల్లడించింది. బాబీ కొల్లి దర్శకత్వంలో తెరకెక్కుతున్న ఈ సినిమా సంక్రాంతికి విడుదల కానుంది. ఈ విషయాన్ని కూడా బాలకృష్ణ న్యూ లుక్ తో వెల్లడించారు. రక్తం అంటిన గొడ్డలి పట్టుకున్న బాలకృష్ణ వెరైటీ లుక్ ను విడుదల చేశారు. సంక్రాంతి బరిలో నిల్చిన బాలకృష్ణ సినిమాలు బాక్స్ ఆఫీస్ వద్ద మంచి విజయాలు దక్కించుకున్నాయి. దీంతో ఇప్పుడు ఈ 109 సినిమాపై కూడా భారీ అంచనాలు ఉన్నాయి. సితార ఎంటర్టైన్మెంట్స్ ఈ సినిమాను తెరకెక్కిస్తున్న విషయం తెలిసిందే. మరో వైపు ఇప్పటికే దిల్ రాజు నిర్మిస్తున్న రెండు సినిమాలు అంటే రామ్ చరణ్ గేమ్ ఛేంజర్, అనిల్ రావిపూడి, వెంకటేష్ కాంబినేషన్ లో తెరకెక్కిన సంక్రాంతికి వస్తున్నాం కూడా సంక్రాంతి బరిలో ఉన్న విషయం తెలిసిందే.

ఇప్పటికైతే మూడు సినిమాలు సంక్రాంతి డేట్ ను లాక్ చేసుకున్నాయి. అప్పటికే ఇంకెన్ని రెడీ అవుతాయో చూడాలి. వాస్తవానికి సంక్రాంతికి చిరంజీవి హీరోగా తెరకెక్కుతున్న విశ్వంభర సినిమా విడుదల కావాల్సి ఉంది. కానీ శంకర్, రామ్ చరణ్ సినిమా కోసం దీన్ని వాయిదా వేసిన సంగతి తెలిసిందే. 2023 జనవరి లో అంటే సంక్రాంతికి ప్రేక్షకుల ముందుకు వచ్చిన చిరంజీవి వాల్తేర్ వీరయ్య, బాలకృష్ణ వీరసింహ రెడ్డి సినిమాలు రెండూ కూడా కమర్షియల్ గా మంచి విజయాన్ని దక్కించుకున్న సంగతి తెలిసిందే. అయితే ఈ సారి సంక్రాంతి బరిలో చిరంజీవి బదులు ఆయన తనయుడు రామ్ చరణ్ సినిమా వస్తోంది. 2023 లో హిట్ చిరంజీవి దక్కించుకున్న వాల్తేర్ వీరయ్య సినిమా దర్శకుడు బాబీ కొల్లి ఇప్పుడు బాలకృష్ణ సినిమాను తెరకెక్కించటం విశేషం.