టాక్ నెగిటివ్.. కలెక్షన్స్ పాజిటివ్!

సంక్రాంతి రేస్ లో భారీ హైప్ మధ్య విడుదల అయిన సినిమా గుంటూరు కారం. స్పెషల్ షోస్ మొదలైన దగ్గరి నుంచి ఈ సినిమాపై నెగిటివ్ ప్రచారం స్టార్ట్ అయింది. ఫ్యాన్స్ సినిమా సూపర్ హిట్ అంటుంటే..మరి కొంత మంది మాత్రం దర్శకుడు త్రివిక్రమ్ శ్రీనివాస్ పై ఎటాక్ స్టార్ట్ చేశారు. ఇందులో కొంత మంది మహేష్ బాబు ఫ్యాన్స్ కూడా ఉండటం విశేషం. ఇవన్నీ పక్కన పెడితే గుంటూరు కారం తొలి రోజు అంటే జనవరి పన్నెండున ప్రపంచ వ్యాప్తంగా తొంబై నాలుగు కోట్ల రూపాయల గ్రాస్ వసూళ్లు సాధించినట్లు చిత్ర యూనిట్ అధికారికంగా ప్రకటించింది. ఎక్కువ థియేటర్లలో విడుదల కూడా కలెక్షన్స్ ఆశాజనకంగా ఉండటానికి ఒక కారణంగా చెప్పుకోవచ్చు. మహేష్ బాబు, త్రివిక్రమ్ కాంబినేషన్ మూవీ కావటంతో ప్రేక్షకులు భారీ అంచనాలు పెట్టుకున్నారు. అయితే అంచనాలు అందుకోవడంలో ఈ సినిమా విఫలం అయింది అనే చెప్పాలి.

ఈ సినిమాలో మహేష్ బాబు కు జోడిగా శ్రీ లీల , మరో పాత్రలో మీనాక్షి చౌదరి నటించింది. వాస్తవానికి తొలుత ఈ సినిమాకు హీరోయిన్ గా పూజా హెగ్డే ను ఎంపిక చేశారు. కారణాలు ఏంటో తెలియదు కానీ ఆమె మధ్యలోనే సినిమా నుంచి తప్పుకున్నారు. తర్వాత కూడా ఈ సినిమాపై పలు ప్రతికూల వార్తలు వచ్చాయి. గుంటూరు కారం విడుదల రోజే అంటే జనవరి పన్నెండునే విడుదల అయిన హనుమాన్ సినిమాకు థియేటర్ల కేటాయింపులో దిల్ రాజు అన్యాయం చేశారు అంటూ ప్రచారం జరగటం...దీంతో పాటు కొన్ని మీడియా సంస్థల విషయంలో దిల్ రాజు, ప్రొడ్యూసర్ నాగ వంశి మాటలు కూడా చాలా మందికి నచ్చలేదు. ఇవన్నీ కలిసి సినిమాపై వ్యతిరేక ప్రచారాన్ని మరింత పెంచాయనే అభిప్రాయం కూడా టాలీవుడ్ వర్గాల్లో ఉంది.