ఎఫ్‌3 సినిమాకు రేట్ల పెంపు లేదు

సినిమా టిక్కెట్ ధర‌ల పెంపుపై ప్రేక్షకుల్లో తీవ్ర వ్య‌తిరేక‌త వ్య‌క్తం అవుతోంది. అందుకే సినిమా ఏ మాత్రం బాగాలేద‌నే టాక్ వ‌చ్చినా సినీ అభిమానులు అస‌లు థియేట‌ర్ల వైపు క‌న్నెత్తి చూడ‌టం లేదు. అందుకు తాజా ఉదాహ‌ర‌ణ ఆచార్య సినిమానే. ఇందులో చిరంజీవితోపాటు తాజాగా ఆర్ఆర్ఆర్ సినిమాతో హిట్ కొట్టిన రామ్ చ‌ర‌ణ్ ఉన్నా కూడా టాక్ బాగాలేక‌పోవ‌టంతో ప్రేక్షకులు థియేట‌ర్ల‌కు దూరం జ‌రిగారు. దీంతో బ‌య్య‌ర్లు భారీ నష్టాలే చ‌విచూడ‌టమే కాకుండా...బాబూ మ‌మ్మ‌ల్ని కాపాడండి అంటూ వేడుకోవాల్సిన ప‌రిస్థితి వ‌చ్చింది. సినిమా ప‌రిశ్ర‌మ‌లో పాతుకుపోయిన దిల్ రాజుకు విష‌యం తెలుసు కాబ‌ట్టే చాలా ముందు జాగ్ర‌త్త నిర్ణ‌యం తీసుకున్నారు.

ఎఫ్‌3 సినిమాకు ప్ర‌త్యేక రేట్ల పెంపు ఏమీలేద‌ని..ప్ర‌భుత్వం నిర్ణ‌యించిన ధ‌ర‌ల‌కే త‌మ సినిమాను విడుద‌ల చేస్తున్న‌ట్లు వెల్ల‌డించారు. అంతే కాదు..ఫ్యామిలీ ఆడియ‌న్స్ అంద‌రూ థియేట‌ర్ల‌కు వ‌చ్చి సినిమా చూడాల‌ని కోరారు. అనిల్ రావిపూడి ద‌ర్శ‌క‌త్వంలో తెర‌కెక్కిన ఎఫ్‌2 సినిమా బాక్సాఫీస్ వ‌ద్ద మంచి విజ‌యాన్ని ద‌క్కించుకున్న విష‌యం తెలిసిందే. దీనికి సీక్వెల్ గానే ఇప్పుడు ఎఫ్ 3 వ‌స్తున్న విష‌యం తెలిసిందే. ఇప్ప‌టికే విడుద‌లైన ఈ సినిమా ట్రైల‌ర్..పూజా హెగ్డె ప్ర‌త్యేక గీతం సినిమాపై హైప్ పెంచుతున్నాయి. మే27న విడుద‌ల కానున్న ఈ సినిమా ప్రేక్షకుల్లో భారీ అంచ‌నాలే ఉన్నాయి.