టాలీవుడ్ లో ఇక సందడే సందడి

సినీ ప్రేమికులకు ఇక పండగే. గత కొన్నిరోజులుగా చిన్న సినిమాలు బాక్స్ ఆఫీస్ వద్ద సందడి చేయగా..భారీ బడ్జెట్ సినిమాలు ఇప్పుడు రేస్ లోకి వస్తున్నాయి. జులై నెలాఖరు నుంచే పవర్ స్టార్ కళ్యాణ్, సాయి ధరమ్ తేజ్ లు కలిసి నటించిన బ్రో మూవీ తో ఈ సందడి షురూ కాబోతోంది. ఆ తర్వాత వెంటనే నవీన్ పోలిశెట్టి, అనుష్క శెట్టి లు కలిసి నటించిన సినిమా మిస్ శెట్టి..మిస్టర్ పోలిశెట్టి ఆగస్టు 4 న విడుదల కానుంది. వీళ్లిద్దరి సినిమా లు రాక చాలా కాలం అయిన విషయం తెలిసిందే. ఆ వెంటనే రెండు భారీ సినిమా ప్రేక్షుకుల ముందుకు రానున్నాయి. ఇందులో ఒకటి సౌత్ ఇండియా సూపర్ స్టార్ రజనీకాంత్ నటించిన జైలర్. ఆగస్టు పది న ప్రేక్షుకుల ముందుకు వస్తుంటే...ఆ మరుసటి రోజే మెగా స్టార్ చిరంజీవి, తమన్నా , కీర్తి సురేష్ నటించిన భోళా శంకర్ సినిమా విడుదల కానుంది. ఆగస్టు 25 న వరుణ్ తేజ్ హీరో గా నటించిన గాండీవధరి అర్జున సినిమా ప్రేక్షుకుల ముందుకు రాబోతోంది. ఇక సెప్టెంబర్ లో అయితే సందడి ఒక రేంజ్ లో ఉండనుంది. సెప్టెంబర్ 1 నే విజయదేవరకొండ, సమంత నటించిన ఖుషి విడుదల అవుతుంటే...సెప్టెంబర్ 15 న 'టిల్లు స్క్వేర్ సందడి చేయనుంది. డీజే టిల్లు కు ఇది కొనసాగింపు. ఈ సినిమా బాక్స్ ఆఫీస్ వద్ద ఎంత పెద్ద సంచలన విజయం నమోదు చేసుకుందో తెలిసిందే. అదే రోజు అంటే సెప్టెంబర్ 15 నే హీరో రామ్ , బోయపాటి శ్రీను దర్శకత్వంలో తెరకెక్కిన స్కంద సినిమా కూడా ప్రేక్షుకుల ముందుకు రానుంది.

సెప్టెంబర్ 28 న అయితే అందరూ ఎంతో ఆసక్తిగా ఎదురు చూస్తున్న సలార్ సినిమా ప్రపంచ వ్యాప్తంగా విడుదల కానుంది. ఈ సినిమా దర్శకుడు ప్రశాంత్ నీల్ కావటం, హీరో ప్రభాస్ కావటంతో దీనిపై అంచనాలు ఒక రేంజ్ లో ఉన్నాయి. సంక్రాంతి లాగానే దసరాకు కూడా ఈ సారి బాలకృష్ణ కొత్త సినిమా విడుదల కాబోతోంది. అనిల్ రావిపూడి తెరకెక్కించిన భగవంత్ కేసరి సినిమా అక్టోబర్ 19 న ప్రేక్షకుల ముందుకు రాబోతోంది. దీంతో బాలకృష్ణ హ్యాట్రిక్ విజయంపై ధీమాతో ఉన్నారు. మరుసటి రోజే అంటే అక్టోబర్ 20 న రవితేజ హీరో గా నటించిన టైగర్ నాగేశ్వర్ రావు సినిమా విడుదల కానుంది. హీరో నాని, మృణాల్ ఠాకూర్ జంటగా నటిస్తున్న హాయ్ నాన్న సినిమా డిసెంబర్ 21 న రానుంది. వెంకటేష్ హీరో గా నటించిన సైంధవ్ సినిమా డిసెంబర్ 22 న ప్రేక్షుల ముందుకు రాబోతోంది. హీరో వెంకటేష్ చేస్తున్న తొలి పాన్ ఇండియా సినిమా ఇది. భారీ అంచనాలు ఉన్న పుష్ప 2 డిసెంబర్ లో ప్రేక్షుకుల ముందుకు వస్తుందా లేక కొత్త సంవత్సరమేనా అన్నది తేలాల్సి ఉంది.