చిరంజీవి ప్రకటనే పవన్ కు కీలకం!
గతం లో ఎన్నడూ లేని రీతిలో పవన్ కళ్యాణ్ ఈ విషయంలో అటు చిరంజీవి, ప్రభాస్ దగ్గర నుంచి మొదలుపెట్టి ఎన్టీఆర్, అల్లు అర్జున్, మహేష్ బాబు, రామ్ చరణ్, రవి తేజ ఇలా అందరి పేర్లు బహిరంగ సభల్లోనే ప్రస్తావించి వాళ్ళ మద్దతు కోరారు. గతంలో ఎన్నడూ లేని రీతిలో ఆంధ్ర ప్రదేశ్ లో జగన్ సర్కారు వచ్చిన తర్వాత సినిమా టికెట్స్ విషయంలో టాలీవుడ్ కు, వైసీపీ ప్రభుత్వం మధ్య వివాదం తలెత్తింది. ఇది అప్పటిలో పెద్ద దుమారమే రేపిన విషయం తెలిసిందే. కొంత మంది హీరో లు వైసీపీ కి వ్యతిరేకంగా మాట్లాడితే సోషల్ మీడియాలో వాళ్ళను, వాళ్ళ సినిమాలను కూడా పెద్ద ఎత్తున టార్గెట్ చేశారు. ఎన్నికలకు చాలా రోజుల ముందు బహిరంగంగా టాలీవుడ్ ను సపోర్ట్ చేయమని కోరిన పవన్ కళ్యాణ్ ఇప్పుడు కూడా మరో సారి అలాంటి అప్పీలు చేస్తారా..లేక తన ప్రచారం తాను చేసుకుంటూ పోతారా అన్నది కూడా కీలకం కానుంది. ఇప్పటి వరకు చిరంజీవి బయటకు వచ్చి తన సోదరుడి పార్టీ కి బహిరంగంగా మద్దతు ఇస్తున్నట్లు ప్రకటించ లేదు. కొద్ది రోజుల క్రితం జన సేన కు ఐదు కోట్ల రూపాయలు విరాళం ఇవ్వటంతో పాటు తమ్ముడిని ఆశీర్వదించారు.
తాజాగా బీజేపీ అనకాపల్లి ఎంపీ అభ్యర్థి సి ఎం రమేష్ కు కూడా అండగా ఉంటానని హామీ ఇచ్చారు. ప్రజలకు మంచి చేసే వాళ్లకు తన మద్దతు ఎప్పుడూ ఉంటుంది అని సీఎం రమేష్ తో చిరంజీవి వ్యాఖ్యానించారు. జన సేన అధినేత, పవర్ స్టార్ పవన్ కళ్యాణ్ సొంత అన్న చిరంజీవి బహిరంగంగా జన సేన, టీడీపీ, బీజేపీ కూటమికి మద్దతు ఇస్తున్నట్లు ప్రకటించకపోతే ఇతర హీరోల మద్దతు కోరే విషయం లో పవన్ ఇరకాటంలో పడే అవకాశం ఉంది. సొంత అన్న మద్దతు ప్రకటించకుండా ఇతర హీరో లను కోరటం ఆయనకు ఇబ్బందికరంగా మారే అవకాశం ఉంది అనే చెపుతున్నారు. టాలీవుడ్ లోని ఇతర హీరో ల సంగతి పక్క పెడితే మెగా ఫ్యామిలీ లో ఉన్న హీరో లు అయిన రామ్ చరణ్, అల్లు అర్జున్, వరుణ్ తేజ్, సాయి ధరమ్ తేజ్ లు బయటపడి కూటమికి మద్దతు ఇస్తారా లేదా అన్నది కూడా ఇప్పుడు ఆసక్తికరంగా మారింది. పవన్ కళ్యాణ్ కు మద్దతు విషయంలో చిరంజీవి గతంలో పలు మార్లు మాటలు మార్చారు. పవన్ కళ్యాణ్ బలంగా టాలీవుడ్ సపోర్ట్ కోరాలంటే కూడా చిరంజీవి నిర్ణయం అత్యంత కీలకం అని చెప్పక తప్పదు.
