హాట్ టాపిక్ గా కందుల దుర్గేష్ తీరు
గత ఎన్నికలకు ముందు జనసేన కు మద్దతు విషయంలో చిరంజీవి ఎన్ని సార్లు మాటలు మార్చారో లెక్కే లేదు. పైగా చిరంజీవి ఎన్నికల ముందు జనసేనకు మద్దతు విషయంలో కూడా సెలెక్టెడ్ గా వీడియో లు విడుదల చేశారు తప్ప...ఇప్పుడు మంత్రిగా ఆయన దగ్గరకు వెళ్లిన కందుల దుర్గేష్ గెలుపునకు కూడా చిరంజీవి పిలుపు ఇవ్వలేదు. గత ఎన్నికల ముందు చిరంజీవి నేరుగా పవన్ కళ్యాణ్ తో పాటు బీజేపీ ఎంపీ అభ్యర్థి గా ఉన్న సీఎం రమేష్, పెందుర్తి జనసేన అభ్యర్థి పంచకర్ల రమేష్ బాబు ల కోసమే బహిరంగంగా వీడియోలు విడుదల చేసిన విషయం తెలిసిందే. వైసీపీ కి, జగన్ కు భయపడే చిరంజీవి అంధ ప్రదేశ్ రాజకీయాల విషయంలో తాను జోక్యం చేసుకోను అని...పూర్తిగా తన వ్యాపకం సినిమాలు తప్ప మరొకటి లేదు అని ప్రకటించిన విషయం తెలిసిందే. ఆంధ్ర ప్రదేశ్ లో కూటమి గెలిచిన తర్వాత ప్రభుత్వ ప్రమాణస్వీకార కార్యక్రమానికి చిరంజీవిని ప్రత్యేక అతిధిగా పిలిచారు. ప్రభుత్వంలో జనసేన కీలక భాగస్వామిగా ఉంటడంతో అందులో పెద్దగా ఆక్షేపించాల్సిన విషయం కూడా ఏమి లేదు. కానీ సినిమాటోగ్రఫీ మంత్రి సినిమా సెట్స్ వెళ్లి చిరంజీవిని కలిసి అక్కడే సినిమా పరిశ్రమ అభివృద్ధికి ..సమస్యల పరిష్కారానికి చర్యలు తీసుకుంటాను అని చెప్పటం వివాదాస్పదం అయ్యే అవకాశం ఉంది.
