ఢిల్లీలో కెసీఆర్ కు ఎదురైన చిక్కు ప్రశ్న!
దిశ ఫ్యామిలీ పరామర్శకు వెళ్లలేదు..పెళ్ళికి ఢిల్లీ వచ్చారా?
తెలంగాణ ముఖ్యమంత్రి కెసీఆర్ గత కొన్ని రోజులుగా జాతీయ మీడియా నుంచి తీవ్ర విమర్శలు ఎదుర్కొంటున్నారు. దిశ రేప్, హత్య కేసు దేశ వ్యాప్తంగా పెద్ద సంచలనం సృష్టించగా..ముఖ్యమంత్రి కెసీఆర్ ఈ ఘటనపై మాత్రం చాలా ఆలశ్యంగా స్పందించారు. ఈ తీరును జాతీయ మీడియా తీవ్రంగా తప్పుపట్టింది. ఇప్పుడు ఆయనకు మరోసారి ఇదే తరహా అనుభవం ఎదురైంది. సోమవారం సాయంత్రం ముఖ్యమంత్రి కెసీఆర్ ప్రత్యేక విమానంలో ఢిల్లీ వెళ్ళిన విషయం తెలిసిందే. అయితే ఈ పర్యటన ఓ పెళ్ళి వివాహ రిసెప్షన్ కోసం అని వార్తలు వచ్చాయి.
మంగళవారం మధ్యాహ్నాం వరకూ సీఎం కెసీఆర్ ప్రధాని మోడీ అపాయింట్ మెంట్ ఖరారు కాలేదు. ఢిల్లీ విమానాశ్రయంలో సీఎం కెసీఆర్ ను ఓ జాతీయ ఛానల్ ప్రతినిధి మాట్లాడుతూ ‘మీరు దిశా పరామర్శకు వెళ్ళలేదు..పెళ్ళికి ఢిల్లీ వచ్చారు?. సర్ మీ సమాధానం ఏంటి’ అని ఆ రిపోర్టర్ కెసీఆర్ ను పదే పదే ప్రశ్నించారు. అయినా కెసీఆర్ ఇదేమీ పట్టించుకోకుండా కారు ఎక్కి వెళ్లిపోయారు. అదే సమయంలో భద్రతా సిబ్బంది ఆ ప్రశ్న అడిగిన జర్నలిస్టును కూడా పక్కకు నెట్టేశారు. ఈ వీడియో ప్రస్తుతం వాట్సప్ లో పెద్ద ఎత్తున సర్కులేట్ అవుతోంది.
