నారా లోకేష్...ఎక్క‌డ ఆ జ‌గ‌న్ సంచ‌ల‌న స్కామ్ లు?!
సినిమా విడుద‌ల‌కు ముందు విడుద‌ల చేసే టీజ‌ర్..ట్రైల‌ర్ త‌ర‌హాలో నారా లోకేష్ భారీ స్కామ్ ల‌పై కూడా టీజ‌ర్ వ‌దిలారు. ఇప్పుడు అస‌లు సినిమాయే ఉందో లేదో తెలియ‌ని ప‌రిస్థితి. సీఎం జ‌గ‌న్ కు సంబంధించి ప‌క్కా ఆధారాల‌తో స్కామ్ లు బ‌య‌ట‌పెడ‌తాన‌ని ప్ర‌కటించి..మౌనంగా ఉండ‌టంతో త‌ప్పుడు సంకేతాలు పంపిన‌ట్లు అవుతుంద‌నే అభిప్రాయం పార్టీ నేత‌ల్లో వ్య‌క్తం అవుతోంది. టీడీపీ అధికారంలో ఉండగా..అప్ప‌టి ప్ర‌ణాళికా సంఘం ఉపాధ్య‌క్షుడు కుటుంబ రావు కూడా ప్ర‌ధాని మోడీకి సంబంధించి భారీ స్కామ్ లు ఉన్నాయ‌ని..వాటిని బహిర్గతం చేస్తే ప్ర‌భుత్వం కూలుతుంద‌ని అంటూ అప్ప‌ట్లో బిల్డ‌ప్పులు ఇచ్చారు. తీరా చూస్తే అంతా తుస్ మ‌న్పించారు. ఇప్పుడు మ‌రి నారా లోకేష్ కూడా కుటుంబ‌రావులాగే చేస్తారా లేక ఆధారాల‌తో వివ‌రాలు బహిర్గతం చేసి మాట నిల‌బెట్టుకుంటారో వేచిచూడాల్సిందే.
