ఏపీ స‌ర్కారుకు ఎన్జీటీ షాక్

అస‌లే ఆర్ధిక క‌ష్టాల్లో ఉన్న ఆంధ్ర‌ప్ర‌దేశ్ ప్ర‌భుత్వానికి జాతీయ హ‌రిత ట్రిబ్యున‌ల్ (ఎన్ జీటీ) షాక్ ఇచ్చింది. ప‌ర్యావ‌ర‌ణ అనుమ‌తుల విష‌యంలో నిబంధ‌న‌లు ఉల్లంఘించార‌నే కార‌ణంతో ఏకంగా 120 కోట్ల రూపాయ‌ల జ‌రిమానా విధించింది. పోల‌వ‌రంతోపాటు మూడు ప్రాజెక్టుల విష‌యంలో ఈ జ‌రిమానా విధించారు. చింత‌ల‌పూడి ప్రాజెక్టుకు సంబంధించి 73.6 కోట్ల రూపాయ‌లు, ప‌ట్టిసీమ‌ ప్రాజెక్టుకు 24.90 కోట్లు, పురుషోత్తం ప‌ట్నం ప్రాజెక్టుకు సంబంధించి 24.56 కోట్ల రూపాయ‌లు జ‌రిమానా విధించింది. ఈ జ‌రిమానాల‌ను మూడు నెల‌ల్లో చెల్లించాల‌ని ఆదేశించారు. ఏపీ కాలుష్య నియంత్ర‌ణా మండ‌లికి ఈ జ‌రిమానాలు క‌ట్టాల‌న్నారు. విశేషం ఏమిటంటే ఈ మూడు ప్రాజెక్టులు కూడా గ‌త ప్ర‌భుత్వ హ‌యాంలో ప్రారంభం అయిన‌వే. ప‌ర్యావ‌ర‌ణ ఉల్లంఘ‌ణ‌ల‌పై అందిన ఫిర్యాదుల‌ను విచారించిన అనంత‌రం ఎన్జీటీ ఈ మేర‌కు ఆదేశాలు జారీ చేసింది.