టీటీడీ భూముల వేలం వద్దు..సర్కారు జీవో జారీ

ఏపీలో పెద్ద రాజకీయ దుమారానికి కారణం అయిన టీటీడీ భూముల వేలం ప్రతిపాదనకు బ్రేక్ పడింది. గత ప్రభుత్వం నియమించిన బోర్డు తీసుకున్న నిర్ణయాల అమలును నిలుపుదల చేస్తూ ఏపీ సర్కారు సోమవారం నాడు జీవో 888 జారీ చేసింది. ఈ మేరకు బోర్డు తీర్మానం 253ను నిలుపుదల చేస్తున్నట్లు జీవోలో పేర్కొన్నారు. 2016 జనవరి 30న చేసిన తీర్మానంలో 50చోట్ల ఉన్న టీటీడీ భూములు అమ్మాలని అప్పటి బోర్డు నిర్ణయించింది. భక్తుల మనోభవాలను దృష్టిలో పెట్టుకుని వ్యవహరించాలని టీటీడీ బోర్డుకు ప్రభుత్వం సూచించింది.

ఈ భూముల అమ్మకం నిర్ణయాన్ని పరిశీలించాలని కోరారు. అంతే కాకుండా భక్తులతోపాటు ఆథ్యాత్మిక పెద్దలు, ఇతర వర్గాల అభిప్రాయాలు తీసుకునే ముందుకెళ్ళాలని సూచించారు. ఈ ప్రక్రియ అంతా పూర్తయ్యే వరకూ ఆ 50 ఆస్తుల అమ్మకం ప్రతిపాదనను పెండింగ్ లో పెట్టాలని టీటీడీ ఈవోను ఆదేశిస్తూ సాదారణ పరిపాలనా శాఖ ముఖ్య కార్యదర్శి ప్రవీణ్ ప్రకాష్ ఉత్తర్వులు జారీ చేశారు. సర్కారు తాజా ఆదేశాలతో వివాదానికి తెరపడినట్లు అయింది.