సీఎం పేషీలో మాజీ సీఎస్

ముఖ్యమంత్రి జగన్మోహన్ రెడ్డి పేషీలో మాజీ సీఎస్ అజయ్ కల్లాం కీలక పాత్ర పోషించనున్నారు. ప్రభుత్వం ఆయన్ను కేబినెట్ హోదాతో ముఖ్య సలహాదారుగా నియమించింది. సీఎం కార్యాలయానికి సంబంధించిన కీలక వ్యవహారాలన్నీ ఆయనే పర్యవేక్షిస్తారు. తెలుగు రాష్ట్రాలకు సంబంధించి ఈ తరహా నియామకం ఇదే మొదటిసారి. పదవి విరమణ చేసిన సీఎస్ ఏకంగా సీఎం కార్యాలయాన్ని లీడ్ చేయటం కొత్త మోడల్ అనే చెప్పొచ్చు. సీఎంవో కార్యదర్శులకు శాఖలను కేటాయించే బాధ్యత కూడా ఆయనకే అప్పగించారు.

ప్రభుత్వ సలహాదారులతోపాటు రాష్ట్రంలో ఏ శాఖకు చెందిన అధికారినైనా పిలిచి సలహాలు ఇచ్చే అధికారాన్ని ప్రభుత్వం ఆయనకు కల్పించింది. అందరూ ఆయనకు బాధ్యత వహించాల్సి ఉంటుంది. ఆయన మూడేళ్లపాటు ఈ పదవిలో కొనసాగుతారు. పర్యటనలకు వెళ్లినప్పుడు ప్రభుత్వ ప్రధాన కార్యదర్శిగా రిటైర్‌ కాకముందు ఉన్న టీఏ, డీఏలు వర్తిస్తాయి. ప్రభుత్వ వాహనంతోపాటు నివాస వసతి సౌకర్యం కల్పిస్తారు. లేదంటే ప్రభుత్వం అద్దె చెల్లిస్తుంది.