గోవాలో విదేశీ మహిళపై లైంగిక దాడి

ప్రస్తుతం గోవా అంతా బిజీ అంటే బిజీ. అసలే క్రిస్మస్ సందడి. మరో వైపు నూతన సంవత్సర వేడుకలకు గోవా ముస్తాబు అవుతోంది. ఈ సీజన్ లో గోవాలో ఎంజాయ్ చేసేందుకు దేశ, విదేశాల నుంచి పెద్ద ఎత్తున పర్యాటకులు తరలివస్తున్నారు. ఈ తరుణంలో చోటుచేసుకున్న ఘటన కలకలం రేపుతోంది. ఓ విదేశీ మహిళపై ఓ వ్యక్తి లైంగిక దాడికి దిగాడు. బ్రిటన్ పర్యాటకురాలికి ఈ చేదు అనుభవం ఎదురైంది. గురువారం ఉదయం బీచ్‌ వద్దకు వెళుతున్న 48 సంవత్సరాల బ్రిటన్‌ పర్యాటకురాలిపై దుండగుడు ఈ దారుణానికి పాల్పడ్డాడని, లైంగిక దాడి అనంతరం ఆమె వస్తువులను అపహరించాడని పోలీసులు తెలిపారు.

పనాజీకి వంద కిలోమీటర్ల దూరంలోని కనాకొన పట్టణంలో గురువారం తెల్లవారుజామున నాలుగు గంటల ప్రాంతంలో ఈ ఘటన జరిగిందని, నేరానికి పాల్పడిన నిందితుడు పరారీలో ఉన్నాడని దక్షిణ గోవా పోలీసులు వెల్లడించారు. బాధితురాలు పాలోలెమ్‌ బీచ్‌కు వెళుతుండగా అడ్డగించిన దుండగుడు ఈ దారుణానికి పాల్పడ్డాడని చెప్పారు. ఒంటరిగా వెళుతున్న మహిళను గమనించిన నిందితుడు ఆమెను రోడ్డు పక్కనే ఉన్న పంటపొలంలోకి బలవంతంగా తీసుకువెళ్లి లైంగిక దాడికి దిగాడు. తర్వాత బాధితురాలికి చెందిన మూడు బ్యాగులను దొంగిలించి పారిపోయాడని పోలీసులు చెప్పారు.