Telugu Gateway
Politics

చంద్రబాబుకు హరీష్ రావు లేఖాస్రం

చంద్రబాబుకు హరీష్ రావు లేఖాస్రం
X

తెలుగుదేశం అధినేత, ఏపీ ముఖ్యమంత్రి చంద్రబాబునాయుడికి తెలంగాణ నీటిపారుల శాఖ మంత్రి హరీష్ రావు లేఖాస్త్రం సంధించారు. తెలంగాణ ప్రాంతానికి తీరని అన్యాయం చేసిన చంద్రబాబు మళ్లీ తెలంగాణపై పట్టు సాధించే ప్రయత్నాల్లో ఉన్నారని ఆరోపించారు. ఏ పార్టీ అయినా పోటీచేయవచ్చని..కానీ తెలంగాణకు వ్యతిరేకంగా ఎన్నో కుట్రలు చేసిన చంద్రబాబు బరిలో తమ అభ్యర్ధులను నిలపటంపైనే అభ్యంతరం అని పేర్కొన్నారు. పలు అంశాలను లేవనెత్తుతూ ఆయన ఓ సుదీర్ఘ లేఖను విడుదల చేశారు. ఇదే అంశాలపై ఆయన మీడియాతోనూ మాట్లాడారు. లేఖలోని ముఖ్యాంశాలు..‘ప్రజాస్వామ్య దేశంలో ఏ పార్టీ అయినా ఎన్నికల్లో పోటీ చేయవచ్చు. ఎవరితో అయినా పొత్తు పెట్టుకోవచ్చు. అధికారంలోకి రావాలని కూడా ఆశించవచ్చు. రాజకీయ పార్టీలకున్న హక్కును మేము గౌరవిస్తున్నాము. కానీ, ఏ ప్రాంతంలో అయినా సరే, ఓ రాజకీయ పార్టీ ఎందుకు అధికారంలోకి రావాలని కోరుకుంటుంది? ఏ నాయకుడైనా ఎందుకు ప్రజాప్రతినిథి కావాలని కోరుకుంటారు? తనకు వచ్చిన అవకాశంతో ఆ ప్రాంతాన్ని అభివృద్ధి పథంలో నడిపించాలని భావిస్తారు. ఆ ప్రాంతంలోని ప్రజలకు సేవ చేయాలని రాజకీయాలను, ఎన్నికలను ఒక అవకాశంగా తీసుకుంటారు. ఒక ప్రాంతంలో కొన్ని సీట్లు గెలుచుకుని పార్టీగా మనుగడ సాగించడం వల్ల, అదే ప్రాంతానికి మోసం చేసే అవకాశం దక్కుతుందనే దుర్భుద్ధి ఎవరికీ ఉండదు.

చంద్రబాబు నాయుడి నాయకత్వం - తెలంగాణ రాష్ట్రం అనే విషయంలో పై సమీకరణలు కుదరడం లేదు. అందుకే, తెలుగుదేశం పార్టీ తెలంగాణలో పోటీ చేసే విషయంలోప్రజలకు తీవ్ర అభ్యంతరం ఉంది. ఎందుకంటే మీరు నరనరాన తెలంగాణ వ్యతిరేకత ఇమిడి ఉన్న వారు. మీరు పక్కా తెలంగాణ ద్రోహి. తెలంగాణ పదమంటేనే గిట్టని వారు.తెలంగాణ ఉద్యమాన్ని సహించని వారు. తెలంగాణ రాష్ట్రం ఏర్పాటే కావద్దని బలంగా కోరుకున్న వారు. కేంద్రంలో బిజెపి అధికారంలో ఉన్నప్పుడు మీ పలుకుబడిని ఉపయోగించి, తెలంగాణ ఏర్పాటును అడ్డుకున్న వారు. తర్వాత కూడా తెలంగాణ ఏర్పాటును అడ్డుకునేందుకు విశ్వ ప్రయత్నాలు చేసి విఫలమైన వారు. అసలు తెలంగాణ ఒక రాష్ట్రంగానే మనుగడ సాగించడం ఇష్టంలేని వారు మీరు. తెలంగాణను విఫలరాష్ట్రంగా చేయాలని సర్వశక్తులూ ఒడ్డిన వారు.

తెలంగాణలో కాస్తో కూస్తో ఉనికి సాధించడం ద్వారా, ఇక్కడ నాలుగు సీట్లు గెలవడం ద్వారా తెలంగాణను బలిపెట్టి, ఆంధ్రప్రదేశ్ ప్రయోజనాలు కాపాడడానికి దారి దొరుకుతుందనే మీ దుర్నీతి నగ్నంగా బహిర్గతం అవుతున్నది. తెలంగాణ రైతులు దశాబ్దాల తరబడి సాగునీటి సమస్యను ఎదుర్కొన్నారు. వారి గోస తీరాలని తెలంగాణ ప్రభుత్వం అనేక ప్రాజెక్టులు నిర్మిస్తున్నది. కానీ మీరు ప్రతీ ప్రాజెక్టుకు అడ్డుపడుతున్నారు. ఏ ప్రాజెక్టు కూడా ముందుకు సాగవద్దని భీష్మించి కూర్చున్నారు. తెలంగాణ ప్రాజెక్టులను అడ్డుకోవడమే ప్రథమ లక్ష్యంగా పెట్టుకున్నారు. కేంద్ర ప్రభుత్వానికి, జల సంఘానికి, రివర్ బోర్డులకు రోజుకో లేఖ రాస్తూ నిత్య జగడం పెడుతున్నారు. తెలంగాణలో ప్రాజెక్టులను అడ్డుకోవడం వల్ల మీరు సాధించాలనుకుంటున్నదేమిటి? తెలంగాణ రైతులు ఇంకా వలసలు పోవాలని, అప్పుల పాలు కావాలని, ఆకలి చావులు చావాలని, ఆత్మహత్యలు చేసుకోవాలని, పల్లెలన్నీ వల్లకాడు కావాలని మీ అంతరాత్మ ఘోషించడం నిజం కాదా? నల్గొండ జిల్లా ప్రజలు ఇంకా ఫ్లోరైడ్ వ్యాధితో కీళ్లు వంకర్లు తిరిగి నరక బాధలు అనుభవిస్తూనే ఉండాలనిమీ పైశాచిక మనస్తత్వం ఉవ్విళ్లూరడం అబద్ధమా? తెలంగాణలో నిత్య కరువు, దుర్భిక్షం తాండవించాలన్నదే మీ దుష్ట పన్నాగాల లక్ష్యం కాదా? తెలంగాణ సర్వనాశనం కావాలని కోరుకునే మీరు తెలంగాణ రాజకీయాల్లో వేలు పెట్టాలనుకోవడందొంగే తాళం చెవి డిమాండ్ చేసినట్లు కాదా?

ముఖ్యమంత్రిగా ఉన్నప్పుడు పాలమూరు జిల్లాను దత్తత తీసుకుంటానని ప్రకటించింది మీరే. ప్రతిపక్షంలో ఉన్నప్పుడు పాలమూరు ప్రాజెక్టును కట్టడం లేదని విమర్శించింది మీరే. అధికారం వస్తే, పాలమూరు కడతామని మానిఫెస్టోలో పెట్టింది మీరే.ఇప్పుడు అదే ప్రాజెక్టు అక్రమమని వాదిస్తున్నదీ, అడ్డుకుంటున్నది మీరే. ఇంతగా రంగులు మార్చడం ఊసరవెళ్లికి కూడా సాధ్యం కాదేమో. తెలంగాణకు కరెంటు ఇవ్వకపోతే, అక్కడి ప్రజలు తీవ్ర ఇబ్బందులు పడతారని మీకు తెలుసు.చిమ్మచీకట్లు కమ్ముకున్న దుస్థితి చూసి, తెలంగాణ ఎందుకు తెచ్చుకున్నామా అని ప్రజలు బాధపడాలన్నది మీ కుటిలత్వం. కరెంటు లేక పరిశ్రమలు మూత పడాలని, తద్వారా తెలంగాణ ప్రగతి ఆగిపోవాలని మీరు ఆశించారు. కరెంటు కోతలను బూచిగా చూపి, తెలంగాణకు వచ్చే పరిశ్రమలను ఆంధ్రప్రదేశ్ కు మళ్లించాలనేది మీ ఎత్తుగడ. అందుకోసమే కదా, విభజన చట్టం ప్రకారం తెలంగాణకు రావాల్సిన కరెంటును ఇవ్వకుండా మోసం చేసింది. తెలంగాణ రాష్ట్రం చిమ్మచీకట్లో మగ్గిపోతుంటే, ఒక్క యూనిట్ కూడా విద్యుత్ ఇవ్వకుండా వికటాట్టహాసం చేసింది మీరు కాదా? తెలంగాణ ఎన్నికల్లో పోటీ చేయాలని భావించిన మీరు ఇప్పటి వరకు తెలంగాణకు చేసిన ద్రోహాలపై కనీసం పశ్చాత్తాపం కూడా ప్రకటించలేదు. చేసిన తప్పును ఒప్పుకోలేదు. భవిష్యత్తులో తెలంగాణ ప్రగతిని అడ్డుకోబోమని మాట కూడా ఇవ్వలేదు. ప్రాజెక్టులపై, కరెంటుపై చేసిన ద్రోహాలు, కుట్రలకు ఇక చరమగీతం పాడతామనే చిత్తశుద్ధిని కూడా వ్యక్తీకరించలేదు. మిమ్మల్ని మోసం చేయాలి, మీకుకీడు తలపెట్టాలి, మీ రాష్ట్రాన్ని సర్వనాశనం చేయాలి, మిమ్మల్ని అంధకారంలో ముంచాలి, అందుకే మీపై పెత్తనం చేసేహక్కు మాకే ఉండాలనుకునే కదా...మీ కౄర మనస్తత్వంతెలంగాణలో అధికారం కోసం తపిస్తున్నది.

సాగునీళ్లు, కరెంటు, హైకోర్టు విభజన, హైదరాబాద్సహాఅన్ని విషయాల్లో తెలంగాణ ప్రజలను అరిగోస పెట్టిన మీరు తెలంగాణ ఎన్నికల్లో పాల్గొనడం ఇక్కడి ప్రజలకు తీవ్ర అభ్యంతకరం. మీరు తెలంగాణకు చేసిన ద్రోహాలు, మోసాలు మీకు గుర్తున్నాయో లేదో మాకు తెలియదు. మీతో అంటకాగాలని ఉవ్విళ్ళూరుతున్న కాంగ్రెస్ పార్టీకి మీ ద్రోహ చరిత్ర తెలుసుకోవాల్సిన అవసరం ఉందో, లేదో మాకు తెలియదు. కానీ, మీ లాంటి మేక వన్నె పులుల విషయంలోప్రజలను అప్రమత్తంగా ఉంచాల్సిన బాధ్యత నిన్నటి స్వరాష్ట్ర సాధన ఉద్యమ కారులుగా, నేటి తెలంగాణ రాష్ట్ర ప్రతినిధులుగామాపై ఎంతగానో ఉంది. అందుకే మీ ద్రోహ చరిత్రను ఆధారాలతో సహా బయట పెడుతున్నాం. అనేక అంశాలున్నప్పటికీ ముఖ్యమైన 19 అంశాలను ఇక్కడ ప్రస్తావిస్తున్నాను.

  1. నీటి పారుదల ప్రాజెక్టులను అడ్డుకోవాలని కుట్రలు చేయడం లేదా?

తెలంగాణ రాష్ట్రానికి గోదావరి, కృష్ణ నదుల్లో కలిపి 1330 టిఎంసిల నీటి వాటా ఉందని సమైక్య రాష్ట్రంలోనే తేల్చారు. ఆ వాటా ప్రకారమే తెలంగాణ ప్రభుత్వం నీటి పారుదల ప్రాజెక్టుల నిర్మాణం చేపట్టింది. పాలమూరు-రంగారెడ్డి, డిండి, కాళేశ్వరం, సీతారామ, భక్త రామదాసు, తుమ్మిళ్ల తదితర ప్రాజెక్టులను అడ్డుకోవాలని, ఇవి అక్రమ ప్రాజెక్టులనిమీరు కేంద్ర ప్రభుత్వానికి, కేంద్ర జల సంఘానికి లేఖల మీద లేఖలు రాస్తూనే ఉన్నారు. మీది కుట్ర కాదా?

  1. పాలమూరు కడతామని 2014 ఎన్నికల్లో మీరు హామీ ఇవ్వలేదా?

పాలమూరు- రంగారెడ్డి ప్రాజెక్టు అక్రమమని చంద్రబాబు నాయుడు గారు మొదటి నుంచి ఆరోపిస్తున్నారు. నేటికీ అదే వాదన చేస్తున్నారు. 2014 తెలంగాణ తెలుగుదేశం పార్టీ మానిఫెస్టోలో పాలమూరు ఎత్తిపోతల పథకం నిర్మిస్తామని హామీ ఇచ్చారు. అదే సమయంలో మహబూబ్ నగర్ లో జరిగిన ఎన్నికల సభలో సాక్షాత్తూ చంద్రబాబు నాయుడు గారి సమక్షంలో నాటి ప్రధాని అభ్యర్థి, నేటి ప్రధాని నరేంద్రమోడీ గారు పాలమూరు ఎత్తిపోతల పథకాన్ని కాంగ్రెస్ కట్టలేకపోయింది, మేము కడతాం అని హామీ ఇచ్చారు. కానీ మీరు పాలమూరు ఎత్తిపోతల పథకం అక్రమమనే వాదన మొదలు పెట్టారు.పాలమూరు, డిండి ప్రాజెక్టులను అడ్డుకోవాలని లేఖల మీద లేఖలు రాస్తున్నారు.

  • తేదీ 09.07.2015 న , తేదీ 08.02.2016న పాలమూరు, డిండి ప్రాజెక్టులను అక్రమ ప్రాజెక్టు అని, దాని నిర్మాణాన్ని అడ్డుకోవాలని ఆంధ్రప్రదేశ్ రాష్ట్ర సాగునీటి ముఖ్య కార్యదర్శి లేఖలు రాశారు. (అనుబందం -1, అనుబందం-2).
  • చంద్రబాబు గారు స్వయంగా ఆప్పటి కేంద్ర జలవనరుల మంత్రి శ్రీమతి ఉమాభారతి గారికి తేదీ 24.04.2016 నాడు లేఖ రాశారు. (అనుబందం -3)
  • 06.2015 న అంతర్రాష్ట్ర విభాగం చీఫ్ ఇంజనీర్ ద్వారా కృష్ణా రివర్ మేనేజ్మెంట్ బోర్డ్ సభ్య కార్యదర్శికి లేఖ రాశారు ( అనుబంధం – 4).
  • 08.2016 న ఆరాష్ట్ర సాగునీటి శాఖ ముఖ్య కార్యదర్శి కేంద్ర జల సంఘం చైర్మన్ గారికి లేఖ రాశారు(అనుబందం –5).ఈ లేఖల్లో కూడా అపెక్స్ కౌన్సిల్ అనుమతి వచ్చేవరకు ప్రాజెక్టుల పనులు ఆపివేయించమని కోరినారు.

  1. కాళేశ్వరం ప్రాజెక్టుపై విషం చిమ్మడం మీ దుష్ట ఆలోచన కాదా?

తెలంగాణలోని దాదాపు 70 శాతం వరకు భూభాగానికి సాగునీరు, మంచినీరు అందించే బృహత్తర ప్రాజెక్టు కాళేశ్వరం ఎత్తిపోతల పథకం. దాదాపు 37 లక్షల ఎకరాలకు సాగునీరు అందించే ప్రాజెక్టు. గోదావరి నదిలో తెలంగాణకున్న 954 టిఎంసిల వాటా నీటిని వాడుకోవడానికి తెలంగాణ ప్రభుత్వం ప్రాజెక్టుల నిర్మాణం చేపట్టింది. చివరికి కాళేశ్వరం ప్రాజెక్టు కూడా అక్రమ ప్రాజెక్టేనని ఆంధ్రప్రదేశ్ జలవనరుల శాఖ కార్యదర్శి తేది 19.03.2017న కేంద్ర జలవనరుల మంత్రిత్వ శాఖ కార్యదర్శికి,క్రిష్ణా రివర్ మేనేజ్మెంట్ బోర్డు సభ్య కార్యదర్శికి(అనుబందం– 7)లేఖ రాశారు.

  1. పాలేరుకు నీళ్లివ్వడం కూడా పాపమేనా?

ఖమ్మం జిల్లా పాలేరు నియోజకవర్గం కూసుమంచి , తిరుమలాయపాలెం, ఖమ్మం రూరల్ , నేలకొండపల్లి, ముదిగొండ తదితర కరువు మండలాలలో 60 వేల ఎకరాలకు సాగు నీరు అందించే భక్త రామదాసు ప్రాజెక్టు కూడా అక్రమమేననిమీరు ఆరోపించారు.01.07.2017న ఈ మేరకు ఆంధ్రప్రదేశ్ ప్రభుత్వం సి.డబ్ల్యు.సి.కి లేఖ రాసింది(అనుబందం–8)

  1. కెసి కెనాల్ కోసం తుమ్మిళ్ల వద్దంటారా?

రాజోలిబండ పథకం చివరి భూములకు నీరందించడానికి , తుంగభద్రజలాల్లో మన వాటా 15.90 టిఎంసిల నీటిని సంపూర్ణంగా వినియోగించుకోవడానికి తెలంగాణా ప్రభుత్వం తుమ్మిళ్ళ ఎత్తిపోతల పథకాన్ని అమలు చేయడానికి సంకల్పించింది. ఈ ప్రాజెక్టు వలనకె సి కెనాల్ ప్రయోజనాలు దెబ్బతింటాయని, ప్రాజెక్టు పనులని ఆపాలనిఆంధ్రప్రదేశ్ జలవనరుల శాఖ ముఖ్య కార్యదర్శి తేదీ07.04.2017నకె.ఆర్.ఎం.బి. సభ్య కార్యదర్శికి లేఖ రాశారు (అనుబందం – 9).

  1. కల్వకుర్తి పై కుట్రలు చేస్తున్నది నిజం కాదా?

నాలుగు లక్షల ఎకరాలకు సాగునీరు అందించడానికి గతంలో కేటాయించిన 25 టిఎంసిలు సరిపోవని భావించిన తెలంగాణ ప్రభుత్వం 40 టిఎంసిలు కేటాయించింది. ఇది అక్రమమనని తేది 07.11.2017న ఆంధ్రప్రదేశ్ జలవనరుల శాఖ ముఖ్య కార్యదర్శి CWC చైర్మన్ కి,KRMB సభ్య కార్యదర్శికిలేఖలు రాశారు(అనుబందం – 10).

  1. పోలవరానికి బదులుగా కృష్ణా నీళ్లు ఇవ్వకుండా నాటకాలు ఆడడం లేదా?

పోలవరం ప్రాజెక్టుకు అనుమతులు లభించిన మరుక్షం నుంచి నాగార్జున సాగర్ ఎగువన ఉన్న రాష్ట్రాలకు 80 టిఎంసిలు కృష్ణా నది నీళ్ల నుంచి ఇవ్వాలని బచావత్ ట్రిబ్యునల్ స్పష్టంగా చెప్పింది. దీని ప్రకారం తెలంగాణకు 45 టిఎంసిలు, కర్ణాటకకు 21 టిఎంసిలు, మహారాష్ట్రకు 14టిఎంసిలు రావాలి. కర్ణాటక, మహారాష్ట్రలు వారికి చేసిన కేటాయింపులను వాడుకుంటున్నాయి. కానీ తెలంగాణకు రావాల్సిన 45 టిఎంసిల విషయంలో మీరు కొర్రీ పెట్టారు. అభ్యంతరం చెపుతూ కేంద్రానికి లేఖలు రాశారు తేది 31.01.2017న ఒక లేఖ (అనుబందం-11), తేది 08.02,2017న మరొక లేఖ కేంద్రానికి రాశారు(అనుబందం- 12). దీంతో కృష్ణా నీటిలో తెలంగాణ వాటా పెరగడం లేదు. ఫలితంగా మహబూబ్ నగర్, నల్గొండ జిల్లాలు నష్టపోతున్నాయి.

  1. శ్రీశైలం నుంచి తెలంగాణకు నీరివ్వొద్దనడం మీ కుతంత్రం కాదా?

పోతిరెడ్డి పాడు ప్రాజెక్టుకు నీటి లభ్యత తగ్గిపోతుంది కాబట్టి, కల్వకుర్తి ద్వారా శ్రీశైలం నుంచి తెలంగాణ రాష్ట్రం నీటిని వాడుకోవద్దని ఆంధ్రప్రదేశ్ ప్రభుత్వం వాదిస్తున్నది. శ్రీశైలంలో 854 అడుగుల నీటి మట్టం ఉంటేనే పోతిరెడ్డిపాడు ద్వారా నీరు అందుతుంది కాబట్టి, తెలంగాణ రాష్ట్రం నీటిని వాడుకోకుండా చూడాలని కె.ఆర్.ఎం.బి. సభ్య కార్యదర్శికి తేది 09.10.2018న ఆంధ్రప్రదేశ్ ప్రభుత్వం లేఖ రాసింది (అనుబంధం 13). కల్వకుర్తి, జడ్చర్ల, నాగర్ కర్నూల్, కొల్లాపూర్, వనపర్తి, అచ్చంపేట నియోజకవర్గాలు నాశనమైపోయినా ఫర్వాలేదు కానీ, ఏ అనుమతీ లేకుండా అక్రమంగా నిర్మించిన పోతిరెడ్డి పాడు ద్వారా రాయలసీమ ప్రయోజనాలు నెరవేరాలన్నది మీ కుతంత్రం కాదా? శ్రీశైలం రిజర్వాయర్ లో తెలంగాణకు భాగస్వామ్యమే లేకుండా చేయాలన్నది మీ ఎత్తుగడ కాదా?

  1. ఎవరి అనుమతితో కొత్త ప్రాజెక్టులు కడుతున్నారు?

తెలంగాణ ప్రభుత్వం తనకున్న నీటి వాటా ప్రకారం ప్రాజెక్టులు నిర్మిస్తుంటే, అవి అక్రమమని గగ్గోలు పెడుతున్న చంద్రబాబు నాయుడు గారు తన రాష్ట్రంలో మాత్రం యధేచ్చగా అక్రమ ప్రాజెక్టులు నిర్మిస్తున్నారు. పట్టిసీమ, పురుషోత్తపట్నంఎత్తిపోతల పథకం,ముచ్చుమర్రి, గుండ్రేవుల, గాజులదిన్నె పథకం,గురు రాఘవేంద్ర ఎత్తిపోతలపథకం,పులికనుమ ఎత్తిపోతల పథకం,సిద్దాపురంఎత్తిపోతల పథకం ,శివభాష్యం ఎత్తిపోతల పథకం, మున్నేరు పథకం, పెన్నా అహోబిలం బ్యాలెన్సింగ్ జలాశయానికి 40 TMC లతుంగభద్రా నీటిని తరలించే ఎత్తిపోతల పథకం, గోదావరి – పెన్నా లింక్ పథకం నిర్మిస్తున్నారు. వీటన్నింటికిఎవరి అనుమతులు పొంది చంద్రబాబు ప్రభుత్వం నిర్మిస్తున్నది? కృష్ణా, గోదావరి బోర్దులకు, తెలంగాణ ప్రభుత్వానికి వీటి డి.పి.ఆర్. కూడా పంపలేదు(అనుబందం-14).

  • పోలవరం మండలాలు గుంజుకోవడం మొదటి అన్యాయం కాదా?

తెలంగాణ రాష్ట్రం ఏర్పడక ముందే, తెలంగాణలో ప్రభుత్వం ఏర్పడితే అడ్డుకుంటుందనే దుర్భుద్దితో నరేంద్రమోడీ గారిపై వత్తిడి తెచ్చి ప్రత్యేక ఆర్డినెన్స్ ఇప్పించి, భద్రాచలం డివిజన్ లోని 7 మండలాలను లాక్కోవడం మీ కుటిలత్వానికి నిదర్శనం కాదా? ఇది తెలంగాణకు తలపెట్టిన తొలి ద్రోహం కాదా?

  1. సీలేరు ప్లాంటు పోవడం వల్ల ఏడాదికి రూ.500 కోట్ల నష్టం చేయడం లేదా?

460 మెగావాట్ల లోయర్ సీలేరు హైడల్ పవర్ ప్లాంటు తెలంగాణ భూభాగంలో ఉంది. పోలవరం మండలాలతో పాటు సీలేరు పవర్ ప్లాంటును కూడా ఆంధ్రప్రదేశ్ ప్రభుత్వం దుర్మార్గంగా గుంజుకున్నది. దీంతో 365 రోజుల పాటు 60 శాతం పిఎల్ఎఫ్ తో విద్యుత్ ఉత్పత్తి చేసే సీలేరు ప్లాంటు తెలంగాణకు కాకుండా పోయింది. ఈ ప్లాంటును గుంజుకుని కూడా కనీసం అక్కడ నుంచి కూడా తెలంగాణకు వాటా ప్రకారం రావాల్సిన కరెంటును ఇవ్వడం లేదు. సీలేరు పవర్ ప్లాంటు తెలంగాణకు కాకుండా పోయినందుకు ఏడాదికి రూ.500 కోట్లు నష్టపోవాల్సి వస్తున్నది. ఇది తెలంగాణకు మీరు చేసిన శాశ్వత నష్టం కాదా?

  • విద్యుత్ పంపిణీ విషయంలో దుర్మార్గమైన వైఖరి అవలంభించలేదా?

తెలంగాణ రాష్ట్రంలో చిమ్మచీకట్లు అలుముకోవాలని, ప్రజలు కరెంటు కోతలు అల్లాడాలని ఆంధ్రప్రదేశ్ ముఖ్యమంత్రిగా పదవీ బాధ్యతలు స్వీకరించిన మొదటి రోజు నుంచి చంద్రబాబు కుట్రలు చేస్తూనే ఉన్నారు. నేటికీ అవి కొనసాగుతున్నాయి. విభజన బిల్లు చట్టం ప్రకారం తెలంగాణకు ఆంధ్రప్రదేశ్ రాష్ట్రంలోని విద్యుత్ ప్లాంట్ల నుంచి రావాల్సిన విద్యుత్ ఇవ్వకుండా తీవ్ర అన్యాయం చేశారు. దీంతో తెలంగాణ ఏర్పడిన మొదటి ఏడాది తీవ్ర కరెంటు కోతలు అనుభవించింది. పంటలు ఎండపోయి రైతులు గుండెలవిసేలా విలపించారు. ఈ గుండెకోతకు మీ కసాయితనం కారణం కాదా?

  • పిపిఏలను ఏకపక్షంగా రద్దు చేసి, 2,465 మెగావాట్లు ఎగ్గొట్టలేదా?

రెండు రాష్ట్రాల్లో 2014 జూన్ నాటికున్న విద్యుత్ ప్లాంట్ల నుంచి, ఆనాటికి నిర్మాణంలో ఉన్న విద్యుత్ ప్లాంట్ల నుంచి ఉత్పత్తి అయ్యే కరెంటులో తెలంగాణకు 53.89 శాతం, ఆంధ్రప్రదేశ్ కు 46.11 శాతం విద్యుత్తును పంపిణీ చేయాలని విభజన బిల్లులో స్పష్టంగా చెప్పారు. ఎపి జెన్ కో, కృష్ణపట్నం, హిందూజా, హైడల్ ప్లాంట్ల ద్వారా తెలంగాణకు ఆంధ్రప్రదేశ్ నుంచి రావాల్సిన 2,465 మెగావాట్ల విద్యుత్ ఇవ్వలేదు. తెలంగాణ డిస్కమ్ లతో ఆంధ్రప్రదేశ్ రాష్ట్రంలోని విద్యుత్ ప్లాంట్లకున్న పిపిఎలను ఏకపక్షంగా రద్దు చేశారు. తెలంగాణకు ఆంధ్రప్రదేశ్ ప్లాంట్ల నుంచి కరెంటు ఇచ్చేది లేదని తేల్చి చెప్పారు (అనుబంధం పవర్ 1).

  • రూ.4,557 కోట్ల నష్టం చేసిన కుటిలత్వం మీది కాదా?

తెలంగాణకు ఇవ్వాల్సిన కరెంటు ఆంధ్రప్రదేశ్ రాష్ట్రం ఎగ్గొట్టడం ద్వారా చంద్రబాబు నాయుడు గారి ప్రభుత్వం ప్రజలకు తీవ్ర ఇబ్బందులు కలిగించడమే కాకుండా, రూ.4,557 కోట్ల మేర నష్టం చేసింది. ఆంధ్రప్రదేశ్ నుంచి కరెంటు రాకపోవడం వల్ల తెలంగాణ రాష్ట్రం తన అవసరాల కోసం బహిరంగ మార్కెట్లో ఎక్కువ రేటు పెట్టి కొనాల్సి వచ్చింది. ఆంధ్రప్రదేశ్ రాష్ట్రం కనుక చట్ట ప్రకారం తెలంగాణకు కరెంటు ఇస్తే, థర్మల్ పవర్ కు యూనిట్ కు రూ.4 రూపాయలు, హైడల్ పవర్ కు యూనిట్ కు రూ.1.03 చెల్లిస్తే సరిపోయేది. కానీ బహిరంగ మార్కెట్ కు పోవడం వల్ల తెలంగాణ రాష్ట్రం యూనిట్ కు రూ.5.54 వరకు చెల్లించి కరెంటు కొనాల్సి వచ్చింది(అనుబంధం పవర్ 2).కొత్త రాష్ట్రంగా అప్పుడప్పుడే నిలదొక్కుకుంటున్న తెలంగాణ గుండెల్లో ఇది మీరు దింపిన గునపం కాదా?

  • ఇవ్వాల్సిన కరెంటు ఇవ్వకుండా.. టెండర్లలో పాల్గొన్న కుంచితత్వం మీది కాదా?

విభజన చట్టం ప్రకారం తెలంగాణకు ఆంధ్ర ప్లాంట్ల నుంచి రావాల్సిన కరెంటు ఇవ్వమంటే తమ వద్ద కరెంటే లేదన్నారు. కానీ తెలంగాణకు కావాల్సిన కరెంటు కోసం టెండర్లు పిలిస్తే, అందులో ఆంధ్రప్రదేశ్ పాల్గొన్నది. తెలంగాణకు ఒక్కో యూనిట్ కు 5.35 చొప్పున చెల్లిస్తే, కరెంటు సరఫరా చేస్తామని టెండర్ కోట్ చేసింది. చట్టం ప్రకారం నాలుగు రూపాయలకు యూనిట్ ఇవ్వమంటే, మా దగ్గర కరెంటు లేదన్న ఆంధ్రప్రదేశ్ రూ.5.35 ఇస్తే మాత్రం కరెంటు ఇస్తామన్నది. అంటే కరెంటు ఉండి కూడా, విభజన చట్టంలో చెప్పినా కూడా ఆంధ్రప్రదేశ్ ప్రభుత్వం ఆ కరెంటును ఇవ్వకుండా, ఎక్కువ రేటు పెట్టి కొంటే ఇస్తామని ముందుకు వచ్చింది(అనుబంధం పవర్ 3). ఇది మీ కుంచిత మనస్తత్వానికి నిదర్శనం కాదా?

ఆంధ్ర ఉద్యోగులను రుద్ది చేసిన 1,000 కోట్లు భారం మోపలేదా?

తెలంగాణ, ఆంధ్రప్రదేశ్ విడిపోయిన తర్వాత ఎక్కడి ఉద్యోగులు అక్కడికి పోవాలి. ఆంధ్రలో పనిచేస్తున్న 350 మంది తెలంగాణ ఉద్యోగులను తెలంగాణ రాష్ట్రం వెనక్కి పిలుపించుకుంది. ఇక్కడే ఉద్యోగాలు ఇచ్చింది. కానీ తెలంగాణలో పనిచేస్తున్న 1,153 మంది ఆంధ్ర ఉద్యోగులను మాత్రం ఆంధ్రప్రదేశ్ ప్రభుత్వం జాయిన్ చేసుకోవడం లేదు. తాము తమ స్వంత ప్రాంతానికి పోవడానికి ఆంధ్ర ఉద్యోగులు సిద్దంగా ఉన్నప్పటికీ, లిఖిత పూర్వకంగా ఈ విషయాన్ని చెప్పినప్పటికీ అక్కడి ప్రభుత్వం మాత్రం మీరు తెలంగాణలోనే ఉండండి అని చెబుతున్నది. ఆంధ్రప్రదేశ్ ప్రభుత్వం కక్షపూరితంగా వ్యవహరించడం వల్ల ఆంధ్రప్రదేశ్ కు చెందిన ఉద్యోగులకు తెలంగాణ విద్యుత్ సంస్థలు నెలకు రూ.15కోట్లకు పైగా జీతాలు చెల్లించాల్సి వస్తున్నది. ఇప్పటి వరకు దాదాపు వెయ్యి కోట్లు వారి జీతాలకే చెల్లించాల్సి వచ్చింది. ఆంధ్ర ఉద్యోగులు ఇక్కడి నుంచి వెళ్ళిపోకపోవడం వల్ల స్థానికులకు ఉద్యోగాలు ఇవ్వలేని పరిస్థితి నెలకొంది. పదోన్నతుల విషయంలో కూడా తెలంగాణ ఉద్యోగులకు అన్యాయం జరుగుతున్నది.

  • ఖాళీ భవనాలు ఇవ్వక పోవడం మీ సంకుచితత్వం కాదా?

ఆంధ్రప్రదేశ్ ప్రభుత్వ నిర్వహణ కోసం పదేళ్ల వరకు హైదరాబాద్ లోని భవనాలు వాడుకోవచ్చని విభజన చట్టంలో చెప్పారు. కానీ ఆంధ్రప్రదేశ్ ప్రభుత్వం తన పాలనా యంత్రంగాన్నంతా అమరావతికి తరలించింది. దీంతో హైదరాబాద్ లో ఎపికి కేటాయించిన భవనాలు ఖాళీగా ఉంటున్నాయి. వాటిలో బల్లులు గుడ్లు పెడుతున్నాయి. పావురాలు కాపురముంటున్నాయి. బూజు పట్టిపోతున్నాయి. అయినా సరే, వాటిని తిరిగి తెలంగాణకు అప్పగించడానికి ఆంధ్రప్రదేశ్ ప్రభుత్వానికి మనసు రావడం లేదు. అమరావతిలోనే వారు అసెంబ్లీని నిర్వహిస్తున్నారు. అసెంబ్లీ భవనంలో కేటాయించిన ప్రాంతాన్ని మాత్రం తెలంగాణకు ఇవ్వడం లేదు. హైదరాబాద్ లోని ఆస్తుల పంపిణీకి సంబంధించి గవర్నర్ గారు ఏర్పాటు చేసిన మంత్రలు కమిటీలో నేను కూడా సభ్యుడిని. ఆ కమిటీలో సభ్యులుగా ఉన్న ఆంధ్ర మంత్రులను అడిగితే, ఖాళీగా అయినా ఉంచుతాం తప్ప ఒక్క గది కూడా ఇవ్వము అని చెప్పడం మీ మరుగుజ్జు తనానికి నిదర్శనం కాదా?

  • హైదరాబాద్ ఆస్తుల్లో వాటా అడగడం మీ దురాశ కాదా?

నిజాం కాలం నుంచి తెలంగాణలో ఉన్న ప్రభుత్వ ఆస్తుల్లో వాటా కోసం ఆంధ్రప్రదేశ్ ప్రభుత్వం వాదిస్తున్నది. కోర్టుల్లో కేసులు వేసింది. నిజాం కాలం నాటి ఆస్తులకు తెలంగాణకే తప్ప, ఆంధ్రప్రదేశ్ కు వాటా ఉండదనే సత్యంమీకు తెలియదా? హైదరాబాద్ ను నేనే నిర్మించానని పదే పదే చెప్పడం తెలంగాణ చరిత్రను పరిహసించడం కాదా?

19.విభజన మాయని గాయం అని బాధ పడలేదా?

తెలంగాణ రాష్ట్ర ఏర్పాటు ఇక్కడి ప్రజలందరికీ ఆనందం కలిగిస్తే, మీరు బాధ పడలేదా? విభజన మాయని గాయమని అనలేదా? గవర్నర్ ప్రసంగంలోనూ ఇదే విషయం చెప్పించి మీ కసి తీర్చుకోలేదా? ఇది మీకున్న తెలంగాణ వ్యతిరేకతకు నిదర్శనం కాదా?

తెలంగాణ రాష్ట్రానికి, తెలంగాణ ప్రజలకు మీరు చేసిన ద్రోహాల్లో, మీరు పన్నుతున్న కుట్రల్లో కొన్నింటిని మాత్రమే నేనిక్కడ ఆధారాలతో సహా బహిర్గతం చేశాను. తెలంగాణ ప్రగతి నిరోధకుడిగా మారిన మీకు, తెలంగాణ అసెంబ్లీ ఎన్నికల్లో పోటీ చేసే నైతిక హక్కు ఉంటుందా? తెలంగాణను బలిపీటం ఎక్కించడానికి మీరు అధికారపీఠం కోరుకోవడం ఎంతటి రాక్షసత్వం?

Next Story
Share it