మియాపూర్-ఎల్ బీ నగర్ మార్గంలో మెట్రో పరుగులు

హైదరాబాద్ లో అత్యంత రద్దీ ఉండే మార్గంలో ట్రాఫిక్ కష్టాలు కొంత మేర అయినా తగ్గబోతున్నాయి. దీనికి ప్రధాన కారణం మియాపూర్-ఎల్ బీ నగర్ మార్గంలో మెట్రో రైలు పరుగులు ప్రారంభించింది. ఇప్పటికే మియాపూర్-నాగోల్ కారిడార్ లో మైట్రో సర్వీసులు అందుబాటులో ఉన్న విషయం తెలిసిందే. ఇప్పుడు కొత్తగా అమీర్ పేట నుంచి ఎల్ బీ నగర్ వరకూ సర్వీసులు ప్రారంభం అయ్యాయి. ఈ సర్వీసులను రాష్ట్ర గవర్నర్ నరసింహన్ జెండా ఊపి ప్రారంభించారు. సోమవారం సాయంత్రం నుంచే ప్రయాణికులకు ఈ సేవలు అందుబాటులోకి వస్తున్నాయి.

హైదరాబాద్ లో మొదట మెట్రో సర్వీసులు గత ఏడాది నవంబర్ లో ప్రధాని నరేంద్రమోడీ ప్రారంభించారు. తాజా మార్గంతో హైదరాబాద్ లో మెట్రో సేవలు 46 కిలోమీటర్ల మేర అందుబాటులోకి వచ్చినట్లు అయింది. ఈ మైలురాయితో హైదరాబాద్ ఓ కొత్త రికార్డును నెలకొల్పింది. ప్రస్తుతం ఢిల్లీ తర్వాత ఎక్కువ మొత్తంలో మెట్రో సర్వీసులు ఉన్న నగరంగా హైదరాబాద్ నిలిచింది. బెంగుళూరులో ప్రస్తుతం 42.3 కిలోమీటర్లు, చెన్నయ్ 35.3 కిలోమీటర్ల మార్గంలోనే మైట్రో రైలు సేవలు అందుబాటులో ఉన్నాయి.